Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 219 Hüküm no: 193 Orijinal metin no: [48b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Palaş v. Dimitri’nin evini Ali Paşa-yı Atik Mahallesi’ndeki para vakfının mütevellisine istiğlal yoluyla sattığı Mahmiye-i İstanbul’da Ali Paşa-yı Atîk Mahallesi’nde sâkin Palaş v. Dimitri nâm zimmî meclis-i şer‘-i hatîrde mahalle-i mezbûre avârızına mevkūfe nukūdun bi’l-fi‘il mütevellîsi olan işbu bâ‘isü’l-kitâb el-Hâc Mehmed b. Ahmed mahzarında ikrâr-ı tâm ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan Belaşer nâm Nasrâniye mülkü ve bir tarafdan Kostanti mülkü ve bir tarafdan Mihalaki bahçesi ve bir tarafdan tarîk-ı âm ile mahdûd iki bâb fevkānî ve bir bâb tahtânî odaları ve cüneyne ve bi’r-i mâ’ ve kenîfi müştemil menzilimi mütevellî-i mezbûra elli esedî guruşa bi-tarîkı’l-istiğlâl bey‘ ve teslîm ol dahi mal-ı vakf-ı mezbûr ile iştirâ ve tesellüm ve kabûl eyleyip semeni olan meblağ-ı mezbûr elli esedî guruşu mütevellî-i mezbûr yedinden tamamen ahz ü kabz eylediğimden sonra yine mütevellî-i mezbûr menzil-i mahdûd-ı mezbûru gıbbe’t-tahliyeti’ş-şer‘iye ve’t-takābuzı’l-mer‘î târih-i kitâbdan üç sene tamamına dek beher sene yedişer buçuk esedî guruşa bana îcâr ve teslîm ben-dahi ber-vech-i muharrer istîcâr ve tesellüm ve kabûl eyledim dedikde gıbbe’t-tasdîkı’ş-şer‘î merkūm Palaş’ın dayısı işbu hazır bi’l-meclis Mihal v. Yani nâm zimmî menzil-i mezbûrun derkine emir ve kabûlü hâviye kefâlet-i sahîha ile kefîl olmağın mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Saferü’l-hayr li-sene ihdâ ve tis‘în ve elf. Şuhûdü’l-hâl: Mustafa Efendi b. Durak el-imâm, İsmail Halîfe el-müezzin, Ahmed Çelebi b. el-müezzin, Hüseyin Beşe b. Abdülhalil, Abdülkerim Efendi.