Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 220 Hüküm no: 194 Orijinal metin no: [48b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in kocası Halil b. Ahmed’e açtığı bazı kıymetli eşyalarla ilgili alacak davasının reddedildiği Mahmiye-i İstanbul’da Hacı Hasan Mahallesi’nde sâkine Âişe bt. Mehmed nâm hatun zâtını ma‘rifet-i şer‘iye ile ârifân olan Süleyman b. Mehmed ve Hüseyin b. Ahmed ta‘rîfleriyle mu‘arrefe oldukdan sonra meclis-i şer‘-i şerîf-i enverde hâlâ zevci olan işbu bâ‘isü’l-kitâb Halil b. Ahmed mahzarında üzerine da‘vâ ve takrîr-i kelâm edip mezbûr Halil’e bundan akdem kendi deyni mukābelesinde âhara rehin vaz‘ etmek için bir ön mücevher kuşak ve bir yâkut hâtem ve on bir altın düğmeli bir hünkârî atlas kaftan ve sekiz altın bir hâre kaftanı mezbûr Halil’e teslîm ol dahi minvâl-i muharrer üzre ahz ü kabz etmişdi suâl olunup eşyâ-i mezkûre mevcûde ise a‘yânını müstehlek ise misliyâtdan olanın emsâlini kıyemiyâtdan olanının ba‘de’s-sübût kıymet-i şer‘iyelerini bana teslîme merkūm Halil’e tenbîh olunmak matlûbumdur dedikde gıbbe’s-suâl ve akībe’l-inkâr müdde‘iyye-i mezbûreden müdde‘âsını mübeyyine beyyine taleb olundukda ityân-ı beyyineden izhâr-ı acz ve istihlâf edicek fi’l-hakīka müdde‘iyye-i mezbûreden bâlâda tafsîli mürûr etdiği minvâl üzre eşyâ-i mezkûreyi ahz ü kabz etmeyip a‘yânı mevcûde ise a‘yânını müstehlek ise misliyâtdan olanın mislini kıyemiyâtdan olanının ba‘de’s-sübût kıymet-i şer‘iyelerini bi-tarîkı’d-damân red ve teslîm lâzım gelmediğine mezbûr Halil’e yemîn teklîf olundukda ol dahi hasbe’l-mesûl yemîn billâhi’l-aliyyü’l-a‘lâ etmeğin mûcebiyle mezkûre Âişe bilâ-beyyine bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’l-hâmis aşer min-Saferü’l-hayr li-sene ihdâ ve tis‘în ve elf. Şuhûdü’l-hâl: Ali Efendi el-imâm, Süleyman Beşe b. Mehmed, Hüseyin b. Ahmed, Halil b. Bayram, Şahin Beşe b. Abdullah.