Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 220 Hüküm no: 195 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed Efendi b. Abdurrahman Efendi’nin varislerinin, Hasan Efendi b. İbrahim’in mûrislerine olan borcunu ondan tahsil ettikleri Husûs-ı âti’l-beyânı mahâllinde ketb ü terkīm için savb-ı şer‘-i enverden irsâl olunan İmâmzâde Mehmed Efendi b. Mustafa mahmiye-i İstanbul’da merhûm Sultân Selim Han Câmi‘-i Şerîfi kurbünde sâkin umdetü’l-kuzât Hasan Efendi b. İbrahim’in menziline varıp zeyl-i kitâbda muharrerü’l-esâmî olan Müslimîn huzûrlarında akd-i meclis-i şer‘-i Nebevî etdikde Edirne kādısı olup bundan akdem vefât eden merhûm Velizâde Ahmed Efendi b. Abdurrahman Efendi’nin verâseti zevceteyn-i metrûketeyni Şimşâd Hatun bt. Abdullah ve Şehbaz Hatun bt. Abdullah ve kebîre kızı Emetullah Hatun’a ve Afîfe Hatun’a ve sagīr oğlu Yahya Çelebi ve sagīre kızı Sâliha’ya münhasıra olup kable’l-kısmet mezbûr Yahya Çelebi dahi vefât edip verâseti vâlidesi Gülbûy bt. Abdullah ile li-eb kız karındaşları mezbûrât Emetullah ve Afîfe ve Sâliha’ya münhasıra olduğu şer‘an zâhir ve müte‘ayyin oldukdan sonra mezbûrât Şimşâd ve Şehbaz ve Gülbûy zâtlarını ma‘rifet-i şer‘iye ile ârifân olan Ataullah Efendi b. Osman ve Mehmed Efendi b. Ali ta‘rîfleriyle mu‘arrefe olduklarından sonra asâleten ve mezbûre Emetullah Hatun’un zevci ve tarafından husûs-ı âti’z-zikre vekîl olup zât-ı mezbûreyi kezâlik ma‘rifet-i şer‘iye ile ârifân olan merkūm Ataullah Efendi ve Hasan Efendi b. Hüsameddin şehâdetleriyle şer‘an vekâleti sâbite olan fahrü’l-müderrisîn Mehmed Efendi b. Ali vekâleten ve sagīre-i mezbûre Sâliha’nın tesviye-i umûru için vasîyy-i muhtâr olan merkūm Ataullah Efendi vesâyeten ve merkūme Afîfe tarafından kezâlik husûs-ı âti’z-zikrde vekîl olup zâtını ma‘rifet-i şer‘iye ile ârifân mezbûrân Ataullah Efendi ve Mehmed Efendi şehâdetleriyle şer‘an vekâleti sâbite olan mezbûre Şimşâd vekâleten meclis-i ma‘kūd-ı mezbûrda işbu sahibü’l-kitâb merkūm Hasan Efendi mahzarında her biri ikrâr-ı tâm ve takrîr-i kelâm edip merhûme-i [merhûm-ı] mezbûr Ahmed Efendi’nin merkūm Hasan Efendi zimmetinde cihet-i karz-ı şer‘îden bin yüz esedî guruş hakkı olup meblağ-ı mezbûrdan hayatında sâbit olan iki yüz esedî guruşdan bâkī dokuz yüz esedî guruşu kable’l-ahz mezbûr Ahmed Efendi vefât edip meblağ-ı mezbûr ırsen akrabâsına isâbet etmişidi lâkin merkūm Hasan Efendi Fethullah Efendi b. el-Hâc Ali nâm sahibü’l-hayrın Gaferyat kasabasında vâki‘ câmi‘-i kebîrde beş eczâ-i şerîfe tilâvetine ve su yolu ta‘mîrine ve fazlası va‘ziyeye vakıf şart eylediği neferden meşrûtiyet üzre mütevellî olmağla vakf-ı mezbûrun asl-ı mâlı olan üç yüz esedî guruşu merhûm-ı mezbûra bi’t-tevliye idâne ve teslîm ol dahi istidâne ve kabz eylediği şer‘an isbât olunup ba‘de’t-tahlîf terekesinden meblağ-ı mezbûru edâ lâzım gelmekle meblağ-ı mezbûr dokuz yüz guruşdan üç yüz guruşu deyn-i mezbûra takās olunup mâ‘adâ altı yüz esedî guruşu hâlâ merkūm Hasan Efendi bize edâ ve teslîm biz dahi yedinden bi-kadri’l-hısas asâlet vekâlet ve vesâyeten bi’t-tamam ve’l-kemâl ahz ü kabz ve teslîm [tesellüm] eyledik meblağ-ı mezbûr bin yüz esedî guruşdan merkūm Hasan Efendi zimmetinde bir akçe ve bir habbe kalmayıp her birimizin âhar ile bi-vechin mine’l-vücûh ve sebebin mine’l-esbâb da‘vâ ve nizâ‘ımız kalmamışdır dediklerinde gıbbe’t-tasdîkı’ş-şer‘iyi’l-mer‘î vâki‘ hâli mezbûr Mehmed Efendi mahâllinde ketb ü terkīm edip ba‘dehû cânib-i şer‘den ma‘an irsâl olunan Ahmed b. Ahmed ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Saferü’l-hayr li-sene ihdâ ve tis‘în ve elf. Şuhûdü’l-hâl: Fahrü’l-kuzât Mehmed Efendi b. Ahmed, Mustafa Efendi b. Ahmed, Şeyh Hasan Efendi [b.] Hüsameddin, Mehmed İvaz Efendi b. Ahmed el-Kādî bi-Gaferyat.