Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 222 Hüküm no: 196 Orijinal metin no: [49a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fazlullah Efendi b. İbrahim ile Antakî Mustafa Efendi’nin alacak davasında sulh oldukları Medîne-i Şâm-ı cennet-meşâm ahâlîsinden Fazlullah Efendi b. İbrahim nâm kimesne meclis-i şer‘-i hatîr-i lâzımü’t-tevkīrde sâbıkā medîne-i mezbûre kādısı olan a‘lemü’l-ulemâi’l-izâm efdalü’l-fudalâi’l-fihâm Antâkî Mustafa Efendi taraf-ı bâhirü’ş-şereflerinden husûs-ı âti’l-beyâna vekîl olduğu Abdi b. Receb ve Mehmed b. Hasan nâm kimesneler şehâdetleri ile şer‘an sâbit olan Mahmud Efendi b. Halil nâm kimesne mahzarında ikrâr ve takrîr-i kelâm edip müvekkil-i mûmâ-ileyh Mustafa Efendi ber-vech-i muharrer bundan akdem medîne-i mezbûre kādısı iken medîne-i mezbûreye tâbi‘ Benî Kinâne ve Havran nâhiyeleri niyâbetini bana sipâriş edip yedime mürâsele verdiklerin[d]e nâhiyeteyn-i mezbûreteyne urbân müstevlî olup zabtetmek emr-i asîr olmağın niyâbet-i mezbûreyi kabûl eylemediğim ecilden müvekkil-i mûmâ-ileyh beni kal‘aya [49b] habs edip bi-gayr-ı vechin şer‘î üç yüz altmış beş esedî guruşumu ahz ü kabz ve mesârifine sarf ile istihlâk etmeğin hâlâ meblağ-ı mezbûr üç yüz altmış beş esedî guruşu müvekkil-i mûmâ-ileyhden hâkim-i muvakki‘-i sadr-ı kitâb -tûbâ-lehû ve hüsnü-meâb- hazretleri huzûrunda da‘vâ ve taleb eylediğimde onlar dahi bi’l-külliye inkâr edip ben-dahi ba‘de’l-isbât tezkiye sadedinde iken beynimize muslihûn tavassut edip da‘vâ-yı mezkûremden beni müvekkil-i mûmâ-ileyh Mustafa Efendi ile beynimizde <> iki yüz yirmi beş guruş üzerine inşâ-i akd-i sulh ettiklerinde ben-dahi sulh-i mezbûru kabûl edip ve bedel-i sulh olan meblağ-ı mezbûr iki yüz yirmi beş esedî guruşu müvekkil-i mûmâ-ileyh yedinden tamamen ahz ü kabz eylediğimden sonra meblağ-ı bâkiyeye müte‘allika âmme-i de‘âvî ve mutâlebâtdan ben mûmâ-ileyh Mustafa Efendi’nin zimmetini ibrâ ve ıskāt edip ol dahi bedel-i sulh-i mezbûra müte‘allika âmme-i de‘âvî ve mutâlebâtdan benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î ma-vaka‘a bi’t-taleb ketb olundu. Fi’l-yevmi’s-sâmin min-Saferü’l-hayr li-sene ihdâ ve tis‘în ve elf. Şuhûdü’l-hâl: İsmail Efendi b. Cemaleddin, Mehmed Çelebi b. İsmail, Şâmî Ahmed Efendi b. Muhibbüddin, Ahmed Çavuş el-Mübâşir, Abdi Çelebi b. Receb.