Bab Mahkemesi 54 Numaralı Sicil (H. 1102 / M. 1691) cilt: 20, sayfa: 329 Hüküm no: 394 Orijinal metin no: [68a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zümrüd bt. Yab’ın oda davasının reddi Mahmiye-i İstanbul’da Sulumanastır’da sâkine Zümrüd bt. Yâb nâm Nasrâniye meclis-i şer‘-i âlîde, sadrî oğlu işbu bâ‘isü’r-rakīm Aritun v. Serkis nâm zimmî mahzarında üzerine da‘vâ ve takrîr-i kelâm edip, mârru’z-zikr Sulumanastır kurbunda vâki‘ bir tarafdan vakıf menzil ve bir tarafdan Arslan zimmî mülkü ve bir tarafdan Toros mülkü ve bir tarafdan tarîk-i âm ile mahdûd büyût-ı adîdeyi müştemil mülk menzilimin sâlifü’z-zikr vakıf menzil ve Toros taraflarında vâki‘ iki fevkānî oda ve cihânnümâ ve bir sofa ve iki tahtânî odasında oğlum merkūm Aritun bi gayri hakkın vaz‘-ı yed etmekle suâl olunup kasr-ı yed edip bana teslîme tenbîh olunmak matlûbumdur dedikde, gıbbe’s-suâl merkūm Aritun cevâbında, vâlidem müdde‘iye-i mezbûre yedimde olan hüccet nâtıka olduğu üzre menzil-i mezkûrun zikr olunan iki fevkānî oda ve cihânnümâ ve bir sofa ve iki tahtânî odasını ba‘de ifrâz, bundan akdem dört yüz elli guruşa bey‘-i kat‘î ile bana bey‘ ve teslîm, ben dahi ba‘de’l-iştirâ ve’t-tesellüm semeni olan meblağ-ı mezbûru yedimden ahz u kabz etmişidi. Hâlâ mülk-i müşterâm olmağla vaz‘-ı yed ederim deyu def‘le mukābele edicek, isre’l-istintâk ve’l-inkâr, mesfûr Aritun’dan def‘-i mezkûrunu mübeyyine beyyine taleb olundukda, udûl-i müslimînden olup mahalle-i mezbûr imâmı ve zeyl-i hüccetde ismi mastûr olan Mehmed Efendi b. Osman ve Osman Efendi b. Halil nâm kimesneler li ecli’ş-şehâde meclis-i şer‘a hâzırân olup isre’l-istişhâd, fi’l-hakīka işbu merkūme Zümrüd hüccet-i mezkûre nâtıka olduğu üzre menzil-i mahdûd-ı mezkûru zikr olunan iki fevkānî oda ve cihânnümâ ve bir sofa ve iki tahtânî odasını ba‘de’l-ifrâz bundan akdem oğlu merkūm Aritun’a dört yüz elli guruşa bizim huzûrumuzda bey‘-i kat‘î ile bey‘ ve teslîm, ol dahi iştirâ ve tesellüm ettiğinden sonra semeni olan meblağ-ı mezbûru mezbûr Aritun’dan ahz u kabz etmişidi. Biz bu husûsa bu vech üzre şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde, ba‘de’t-ta‘dîl ve’t-tezkiye şehâdetleri makbûle olmağın, mûcebince müdde‘iye-i merkūme Zümrüd ber vech-i muharrer bî-vech mu‘ârazadan men‘ olunup, mâ vaka‘a bi’t-taleb ketb olundu. Min evâsıtı Cumâdelâhire sene 1102. Şuhûdü’l-hâl: Mehmed Efendi b. Mehmed, Mehmed Çelebi b. Mehmed, Mustafa Ağa b. ( ), Mehmed Ağa ( ), Ahmed b. İbrahim, İbrahim Çelebi b. Mehmed.