Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 227 Hüküm no: 201 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Hasan’ın vârisi olmadan vefat eden Mehmed Paşa b. Derviş’in varisi olduğunu ispat ettiği Dârü’l-hilâfeti’l-aliyye Kostantıniyye el-mahmiye’de Odabaşılarbaşı [Odalarbaşı] kurbünde Balcı Yokuşu Mahallesi ahâlîsinden olup kasaba-i Ruscuk’da sâkin iken bundan akdem vefât eden Hamamcı demekle şehîr Mehmed Paşa b. Derviş’in ber-vech-i âtî hasren veresesi olduğunu iddi‘â eden işbu bâ‘isetü’l-kitâb Ümmühani bt. Hasan nâm hatun Dîvân-ı Hümâyûn-ı şefket [şevket]-makrûnda ma‘kūd meclis-i şer‘-i şerîf-i enverde müteveffâ-yı mezbûrun zâhirde vâris-i ma‘rûfu olmayıp terekesi beytü’l-mâle âide olmak zu‘muyla terekesine vâzı‘u’l-yed olan bi’l-fi‘il defterdâr-ı şıkk-ı evvel câmi‘ü’l-emvâli’s-Sultâniye âmirü’l-hazâini’l-Osmâniye zü’l-kadri’r-refî‘ ve’l-izzi’l-menî‘ Hasan Efendi mahzarında üzerine takrîr-i da‘vâ edip müteveffâ-yı mezbûr Mehmed Paşa’nın vâlidesi Sâliha nâm hatun ile benim babam Hasan b. Ahmed nâm kimesnenin firâşından hâsıl ve zevcesi Havva’dan mütevellid li-ebeveyn karındaşlar olup hatta mezbûr Mehmed Paşa hâl-i hayatında vech-i meşrûh üzre ben hasren veresesi olduğumu ikrâr ve ben tasdîk edip musırrân vefât edip terekesi ırsen bana isâbet etmiş-iken müşârün-ileyh Hasan Efendi tereke-i müteveffâ-yı mezbûru bana teslîmden imtinâ‘ eder suâl olunup alıverilmesi matlûbumdur dedikde gıbbe’s-suâl müşârün-ileyh Hasan Efendi cevâbında fi’l-hakīka müteveffâ-yı mezbûrun terekesine ber-vech-i meşrûh vaz‘-ı yedini ikrâr lâkin müdde‘iyye-i mezbûrenin verâsetini inkâr edicek müdde‘iyye-i mezbûreden müdde‘âsına beyyine taleb olundukda zât-ı mezbûreyi ma‘rifet-i şer‘iye ile ârifân udûl-i Müslimînden zikrolunan Balcı Yokuşu Mahallesi’nde sâkin ve müteveffâ-yı mezbûrun hayatında kâtibi olan Hasan b. Mehmed ve Müezzin Ali b. Ahmed nâm kimesneler li-ecli’ş-şehâde meclis-i mezbûra hâzırân olup isre’l-istişhâd fi’l-vâki‘ müteveffâ-yı mezbûr Mehmed Paşa bundan akdem hâl-i hayatında kendi vâlidesi Sâliha nâm hatun ile işbu müdde‘iyye-i mezbûre Ümmühani’nin babası Hasan b. Ahmed nâm kimesnenin firâşından hâsıl ve zevcesi Havva’dan mütevellid li-ebeveyn karındaşlar olup verâseti mezbûre Ümmühani’ye münhasıra veresesi olduğunu bizim huzûrumuzda ikrâr ve mezbûre Ümmühani tasdîk edip musırrân vefât eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde şâhidân-ı mezbûrânı ta‘dîl ve tezkiye için cânib-i şer‘-i mergūbdan irsâl olunan Mustafa Efendi b. Abdülaziz mahalle-i mezbûreye varıp kasaba-i mezbûre ahâlîsinden olup mahalle-i mezbûrede mütemekkin es-Seyyid Mehmed Efendi b. es-Seyyid Ahmed [ve] es-Seyyid Hasan Ağa b. Mehmed ve Yusuf Ağa b. Abdullah ve Ömer Ağa b. Yakub ve İmâm Mehmed Efendi b. Receb ve Murtaza Efendi b. Mehmed ve Mehmed Efendi b. Hüseyin ve İbrahim Beşe b. Mustafa ve Mustafa Bey b. Musa ve Veli Çelebi b. Ramazan ve es-Seyyid Mustafa Çelebi b. es-Seyyid Mehmed ve Hasan Çelebi b. Mahmud ve Halil Efendi b. Ebîbekir ve Abdullah Çelebi b. Hüseyin’den şâhidân-ı mezbûrânın hâllerin istikşâr[f] etdikde mezbûrân Hasan ve Ali’nin ad[l] ve makbûlü’ş-şehâde olduklarını her biri haber vermeğin vâki‘ hâli mezbûr Mustafa Efendi mahâllinde ketb ü tahrîr ba‘dehû ma‘an ba‘s olunan Mehmed b. Ahmed ile meclis-i şer‘a gelip [51b] haber vermekle emr-i ta‘dîl ve tezkiye tamam ve şehâdetleri makbûle olmağın mûcebiyle mezbûre Ümmühani’nin verâsetine ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâmin aşer min-Saferü’l-hayr li-sene ihdâ ve tis‘în ve elf. Şuhûdü’l-hâl: Ömer Ağa b. Yakub, Yusuf Ağa b. Abdullah, es-Seyyid Mehmed Efendi Kāimmakām, es-Seyyid Hüseyin Ağa b. Ahmed.