Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 229 Hüküm no: 203 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Salih’in Ahmed Çelebi b. Mehmed Çavuş’a açtığı tımarla ilgili alacak davasının reddedildiği Dergâh-ı âlî -dâme mahfûfen bi’l-meâli- yeniçerilerinin altmış birinci solaklara mahsûs oda yoldaşlarından olan Mehmed Beşe b. Salih nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb es-Seyyid Ahmed Çelebi b. Mehmed Çavuş nâm kimesne mahzarında üzerine da‘vâ ve takrîr-i kelâm edip gāib ani’l-meclis Şâtır Ahmed Ağa’nın Vilâyet-i Rumeli’nde Çirmen Sancağı’nda olan tımarı bin doksan senesinde mezbûr es-Seyyid Ahmed Çelebi’nin uhdesinde olmağla sene-i mezbûreye mahsûb olmak üzre mezbûr es-Seyyid Ahmed Çelebi tımar-ı mezbûru bana dört yüz esedî guruşa der-uhde ben-dahi kabûl edip meblağ-ı mezbûru mezbûr es-Seyyid Ahmed Çelebi’ye def‘ ü teslîm ol dahi ahz ü kabz eylediğinden sonra ben-dahi tımar-ı mezbûru zabteylediğimde tımar-ı mezbûrdan yetmiş esedî guruş zararım olmağla hâlâ mezbûr es-Seyyid Ahmed Çelebi’ye suâl olunup meblağ-ı mezbûr yetmiş esedî guruşu bana def‘ ü teslîme tenbîh olunmak matlûbumdur dedikde gıbbe’s-suâl mezbûr es-Seyyid Ahmed Çelebi cevâbında müdde‘î-i mezbûr Mehmed Beşe tımar-ı mezbûru varıp zabtedip geldiğinden sonra tımar-ı mezbûrdan zararım olmayıp mezbûr tımar için sana verdiğim meblağ-ı mezbûr dört yüz esedî guruşa müte‘allika seninle da‘vâ ve nizâ‘ım yokdur zimmetini ibrâ-yı âm ile ibrâ ve ıskāt eyledim deyü huzûr-ı Müslimînde zimmetimi ibrâ ve ıskāt etmişidi deyü def‘le mukābele edicek gıbbe’l-istintâk ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden olup mahmiye-i mezbûrede Küçük Pazar’da sâkin es-Seyyid Mustafa Çelebi b. es-Seyyid Ahmed ve Ali Paşa-yı Atîk Mahallesi’nde sâkin Mustafa Çelebi b. Mustafa nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr Mehmed Beşe tımar-ı mezbûru bin doksan senesinde varıp zabtedip geldiğinden sonra tımar-ı mezbûrdan zararım olmayıp tımar-ı mezbûr için sana verdiğim dört yüz esedî guruşa müte‘allika seninle da‘vâ ve nizâ‘ım yokdur zimmetini ibrâ-yı âmm ile ibrâ ve ıskāt eyledim deyü mezbûr es-Seyyid Ahmed Çelebi’nin zimmetini bizim huzûrumuzda ibrâ-i âm ile ibrâ ve ıskāt eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-i mezbûr Mehmed Beşe’yi vech-i mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâdis aşer min-Saferü’l-hayr li-sene ihdâ ve tis‘în ve elf. Şuhûdü’l-hâl: es-Seyyid Ali Çavuş [b.] Nakīb Çavuş, es-Seyyid İbrahim Çavuş el-Mübâşir, el-Hâc Hüseyin b. Nasuh, es-Seyyid Ebûbekir Çavuş, Mahmud Çelebi el-mukayyid, Ahmed Çelebi b. Piyale, Mehmed Çelebi b. Haydar.