Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 232 Hüküm no: 205 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli Beşe b. Ahmed’in bakkal dükkânının ortağı olan Hasan Beşe’nin ortaklığını feshederek sermaye ve kazancını Süleyman b. Receb’e havale ettiği Mahmiye-i İstanbul’da Fethiye Câmi‘-i Şerîfi kurbünde sâkin Veli Beşe b. Ahmed nâm kimesne mahzarında ikrâr-ı tâm ve takrîr-i kelâm edip mezbûr Hasan Beşe bundan akdem merhûm Sultân Selim Han -aleyhi’r-rahmetü ve’r-rıdvân- Câmi‘-i Şerîfi kurbünde vâki‘ bir bâb bakkāl dükkânımda destgâhdârım ve şerîkim olmağla hâlâ fesh-i akd-i şirket edip beynimizde hesâb gördüğümüzde asl-ı mâl ve fâideden mezbûrun zimmetinde ancak iki bin sekiz yüz otuz akçe hakkım zuhûr etmekle meblağ-ı mezbûr iki bin sekiz yüz otuz akçeyi işbu hazır bi’l-meclis Süleyman b. Receb nâm kimesneye üçümüz bir meclisde iken havâle-i sahîha-i şer‘iye ile havâle edip onlar dahi her biri havâle-i mezkûreyi kabûl eylediklerinden sonra şirket-i mezkûreye ve sâir târih-i kitâba gelince beynimizde cereyân eden ahz ü i‘tâ ve mu‘âmelât-ı şettâya müte‘allika âmme-i de‘âvî ve mutâlebât ve eymân ve muhâsamâtdan mezbûr Hasan Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim min-ba‘d mezbûr Hasan Beşe ile şirket-i mezkûreye ve sâire müte‘allika vechen mine’l-vücûh da‘vâ ve nizâ‘ım yokdur dedikde gıbbe’t-tasdîkı’ş-şer‘î mezbûr Süleyman dahi meclis-i mezbûrda merkūm Hasan Beşe mahzarında i‘âde-i kelâm edip bâlâda ketb ü tahrîr olunup merkūm Veli Beşe’nin merkūm Hasan Beşe’den bana havâle eylediği meblağ-ı mezkûr iki bin sekiz yüz otuz akçeyi mezbûr Hasan Beşe bana tamamen edâ ve teslîm ben-dahi yedinden ahz ü kabz ve tesellüm edip ben-dahi meblağ-ı mezbûra ve sâir târih-i kitâba gelince beynimizde cereyân eden ahz ü i‘tâya müte‘allika âmme-i da‘vâdan mezbûr Hasan Beşe’yi ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’l-mu‘teberi’l-vicâhî mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-Saferü’l-hayr li-sene ihdâ ve tis‘în ve elf. Şuhûdü’l-hâl: Kösec el-Hâc Ali, Bakkāl el-Hâc Ali, Süleyman b. Receb, Mehmed Bey b. el-Bevvâb, Kaşıkçı el-Hâc Hasan.