Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 232 Hüküm no: 206 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime bt. Abdullah ile eski kocası Mehmed b. Ahmed’in alacak davasında sulh oldukları Mahmiye-i İstanbul’da Ağa Çayırı kurbünde Ali Fakīh Mahallesi sâkinelerinden Rahime bt. Abdullah nâm hatun zâtını ma‘rifet-i şer‘iye ile ârifân es-Seyyid Mustafa b. Ahmed ve Mustafa Çelebi b. Mehmed ta‘rîfleriyle mu‘arrefe oldukdan sonra meclis-i şer‘-i şerîfde sâbıkā zevci olan işbu râfi‘u’l-kitâb Mehmed b. Ahmed nâm kimesne mahzarında ikrâr ve takrîr-i kelâm edip mezbûr Mehmed mukaddemâ zevcim olup beni tatlîk etmekle mezbûr Mehmed zevciyet beynimizde kāime iken yedimden iştirâ ve kabz eylediği her çifti sekizer guruşdan dört çift Bursa yasdığı semenlerinden otuz iki esedî guruş ve her biri ikişer guruşdan iki beledî döşek yüzleri semenlerinden dört guruş ve bir peçe semeninden iki guruş ve bir üstlük semeninden bir buçuk esedî guruş ki cem‘an eşyâ-i mezkûre semenlerinden zimmetimde otuz dokuz buçuk esedî guruş hakkım vardır deyü benden taleb ve da‘vâ eylediğinde beynimizde münâza‘ât-ı kesîre cereyânından sonra beynimize muslihûn tavassut edip da‘vâ-i mezkûresinden benim ile beynimizde an-ikrârin yirmi esedî guruş üzerine akd-i musâlaha olundukda ol dahi sulh-i mezbûru kabûl ve bedel-i sulh olan meblağ-ı mezbûru benden tamamen ahz ü kabz edip ziyâdeye ve hukūk-ı zevciyete müte‘allika âmme-i da‘vâdan mezbûr Mehmed benim zimmetimi ibrâ ve ıskāt etmekle ben-dahi bedel-i sulh deyü medfû‘um olan meblağ-ı mezbûra ve hukūk-ı zevciyete ve sâir târih-i kitâba gelince beynimizde cereyân eden ahz ü i‘tâ ve mu‘âmelât-ı şettâya müte‘allika âmme-i da‘vâdan mezbûr Mehmed’in zimmetini ibrâ-yı âmm-ı kātı‘u’n-nizâ‘la ibrâ ve ıskāt eyledim min-ba‘d her birimizin âharı ile vechen mine’l-vücûh da‘vâ ve nizâ‘ımız kalmadı dedikde mâ-vaka‘a bi’t-taleb ketb olundu. Fi’l-yevmi’l-işrîn min-Saferü’l-hayr li-sene ihdâ ve tis‘în ve elf. Şuhûdü’l-hâl: Hasan b. Ömer, Ahmed b. Mehmed, Hasan Çelebi b. Receb, Abdullah Efendi el-imâm, Hâfız Mehmed Efendi b. ( ), İbrahim Çelebi b. ( ).