Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 233 Hüküm no: 207 Orijinal metin no: [52b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. İbrahim’in Hasan Çelebi b. Abdullah’taki alacağının bir miktarıyla vasiyette bulunduğu Husûs-ı âti’l-beyânın mahâllinde tahrîri iltimâs olunmağın savb-ı şer‘-i mübînden irsâl olunan Mevlânâ Hüseyin Efendi b. Hasan mahmiye-i İstanbul’da Kızıl Mescid Mahallesi’nde sâkine Sâliha bt. İbrahim nâm hatunun <> menziline varıp zeyl-i kitâbda muharrerü’l-esâmî olan Müslimîn huzûrunda akd-i meclis-i şer‘-i şerîf eyledikde zâtını ma‘rifet-i şer‘iye ile ârifân Mehmed Halîfe b. Ahmed ve Hasan b. Abdünnebi nâm kimesneler ta‘rîfleri ile mu‘arrefe olan mezbûre Sâliha meclis-i ma‘kūd-ı mezbûrda ber-vech-i âtî vesâyâsını tenfîze vasîyy-i muhtâr eylediği [53a] işbu bâ‘isü’l-kitâb Yahya Efendi b. Mehmed nâm kimesne mahzarında ikrâr ve takrîr-i kelâm edip küllü nefsin zâikatü’l-mevt ve küllü hayyin yülâkīhi’l-fevt fehvâsınca bi-emrillâhi te‘âlâ ben kazâ-i nahb ve likā-i Rabb eylediğimde işbu hazır bi’l-meclis Hasan Çelebi b. Abdullah zimmetinde cihet-i karz-ı şer‘îden hakkım olan elli esedî guruşun yirmi esedî guruşu hîn-i vefâtımda techîz ve tekfînime ve ıskāt-ı salâtıma ve üçüme ve yedime ve kırkıma ve seneye harc ü sarf olunup bâkī kalan otuz guruşun beş esedî guruşu ile sâir esâs-ı beyte müte‘allika muhallefâtımdan bir büyük tencere ve bir güğüm ve bir yemenî yorgan ve iki beledî yasdık ve bir ûd-reng zenne ferâcem mezbûr Yahya Efendi’nin zecvesi gāibetü ani’l-meclis Fâtıma bt. Abdullah nâm hatuna verile deyü vasiyet ve ber-vech-i muharrer tenfîzine mezbû[r] Yahya Efendi’yi vasîyy-i muhtâr nasb ve ihtiyâr eyledim dedikde mezbûr Yahya Efendi dahi vesâyet-i mezbûreyi kabûl ve hizmet-i lâzımesin edâya ta‘ahhüd etmeğin husûs-ı mezbûru mevlânâ-yı mezbûr mahâllinde tahrîr ba‘dehû ma‘an irsâl olunan Mehmed Çelebi b. Cafer ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Saferü’l-hayr li-sene ihdâ ve tis‘în ve elf. Şuhûdü’l-hâl: Mehmed Çelebi b. Ma‘den, Hasan Çelebi b. Abdullah, Mehmed Çelebi b. Ahmed, Ömer Beşe b. Osman, Mehmed Çelebi b. Haydar, Mehmed Halîfe b. Mustafa, Osman Beşe b. Ahmed, Mehmed Çelebi Bostânî.