Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 234 Hüküm no: 208 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anneanne, dede ve annesi vefat eden Mehmed adlı küçük çocuğun babası ve velisi Halil Ağa’nın Gülgûn bt. Abdullah ile Belkıs bt. Abdullah adlı azatlı cariyelere ölenlerin terekelerinden eşya aldıkları iddiasıyla açtığı davanın reddedildiği Mahmiye-i İstanbul mahallâtından Debbağzâde Mahallesi’nde sâkine iken bundan akdem vefât eden Sâliha Hatun bt. Abdullah’ın verâseti zevc-i metrûkü Hasan Ağa b. Abdullah ve sulbiye kebîre kızı Rukiye’ye münhasıra olup ba‘dehâ mezbûre Rukiye dahi vefât edip ve[r]âseti babası mezbûr Hasan Ağa’ya ve zevc-i metrûkü Halil Ağa b. ( ) ve sadrî sagīr oğlu Mehmed’e münhasıra olup ba‘dehâ mezbûr Hasan Ağa dahi vefât edip verâseti kızı oğlu sagīr-i mezbûr Mehmed’e münhasıra olduğu şer‘an sâbit ve zâhir oldukdan sonra sagīr-i mezbûr Mehmed’in babası ve velîsi olan mezbûr Halil Ağa meclis-i şer‘-i hatîr-i lâzımü’t-tevkīrde işbu bâ‘iseteyi’l-kitâb müteveffât-ı mezbûre Sâliha’nın mu‘takaları olan Gülgûn bt. Abdullah ve Belkıs bt. Abdullah mahzarlarında bi’l-velâye üzerlerine da‘vâ ve takrîr-i kelâm edip mezbûretân Gülgûn ve Belkıs müteveffât-ı mezbûre Rukiye ile babası müteveffâ-yı mezbûr Hasan Ağa’nın vefâtlarında yanlarında hizmetlerinde olmağla müteveffât-ı mezbûre Rukiye Hatun’un muhallefâtından iki çift Bursa yasdığı ve bir inci saçlık ve bir sorguç ve üç kumaş yorgan ve otuz şerbetî makrama ve yirmi don ve yirmi gömlek ile müteveffâ-yı mezbûr Hasan Ağa’nın muhallefâtından dahi bir cedîd yeşil ferâce ve bir çift incili küpe ve bir telli yorgan ve bir kahve ibriği ve bir büyük kazgan ve bir sîm bıçak ve iki yemenî yorganı mezbûretân Gülgûn ve Belkıs ahz ü kabz ve ketm ü ihfâ etmekle hâlâ mezbûretâna suâl olunup eşyâ-i mezbûrenin a‘yânı mevcûde ise a‘yânı müstehleke ise kıymet-i şer‘iyelerini bana bi’l-velâye def‘ ü teslîme mezbûretâna tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin zikrolunan eşyâları ber-vech-i muharrer müteveffât-ı mezbûre Rukiye ile mezbûr Hasan Ağa’nın hîn-i vefâtlarında terekelerinden ahz ü kabz ve ketm ü ihfâ etmeyip bir vech ile üzerlerine red ve damândan bir nesne lâzım olmadığına mezbûretân Gülgûn ve Belkıs’[a] yemîn teklîf olundukda her biri alâ-vefki’l-mesûl yemîn billâhi’l-aliyyü’l-a‘lâ etmeğin mûcebince müdde‘î-i mezbûr bilâ-beyyine bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Saferü’l-hayr li-sene ihdâ ve tis‘în ve elf. Şuhûdü’l-hâl: el-Hâc Osman b. Yusuf, Mustafa Çelebi b. Mehmed, Abdurrahman Efendi el-imâm, Süleyman b. Muslı.