Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 235 Hüküm no: 209 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yasef ve İsak adlı Yahudilerin Yusuf Bey b. Abdullah’a 300 kuruş borçları olduğunu ikrar ettikleri Mahmiye-i İstanbul’da Derviş Ali Mahallesi sükkânından işbu bâ‘isü’l-kitâb Yusuf Bey b. Abdullah nâm kimesne meclis-i şer‘-i hatîr-i lâzımü’t-tevkīrde tâife-i Yahûd’un Kiroz cemâ‘atinden olan Yasef v. İsak ve Mayoz cemâ‘atinden olan İsak v. Yayha [Yahya?] nâm Yahûdiler muvâcehe[ler]inde üzerine da‘vâ ve takrîr-i kelâm edip mezbûrân Yasef ve İsak’a bundan akdem üç yüz esedî guruşumu ikrâz ve teslîm onlar dahi iktirâz ve kabz ve tesellüm etmişler idi hâlâ suâl olunup meblağ-ı mezbûr üç yüz esedî guruşu bana edâ ve teslîme mezbûrâna tenbîh olunmak matlûbumdur dedikde gıbbe’s-suâl mezbûrân Yasef ve İsak cevâblarında kazıyye müdde‘î-i mezbûrun tafsîl etdiği vech üzre olup cihet-i karz-ı şer‘îden müdde‘î-i mezbûr Yusuf Bey’e zimmetlerinde elân üç yüz esedî guruş vâcibü’l-edâ ve lâzımü’l-kazâ deynleri olduğunu her biri bi’t-tav‘i’s-sâf ikrâr ve i‘tirâf etmeleriyle mûcebince meblağ-ı mezbûr üç yüz esedî guruşu mezbûr Yusuf Bey’e edâ ve teslîme mezbûrân Yasef ve İsak’a tenbîh birle mâ-vaka‘a bi’t-taleb ketb olundu. Fi’l-yevmi’l-işrîn min-Saferü’l-hayr li-sene ihdâ ve tis‘în ve elf. Şuhûdü’l-hâl: Mahmud Çelebi Mukayyid, Hasan Efendi el-kâtib, Abdullah Efendi el-kâtib, Mehmed Çelebi b. Haydar.