Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 242 Hüküm no: 214 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed adlı küçük çocuğun babası ve velisi Halil Ağa’nın, Gülgûn bt. Abdullah ve Belkıs bt. Abdullah adlı azatlı cariyelere Mehmed’in ölen dedesinin muhallefatından eşya aldıkları iddiasıyla açtığı davanın reddedildiği Mahmiye-i İstanbul’da Debbağzâde Mahallesi’nde sâkine iken bundan akdem vefât eden Sâliha Hatun bt. Abdullah’ın verâseti zevc-i metrûkü Hasan Ağa b. Abdullah’a ve sadriye kebîre kızı Rukiye’ye münhasır[a] olup ba‘dehâ mezbûre Rukiye dahi vefât edip verâseti babası mezbûr Hasan Ağa’ya ve zevc-i metrûkü Halil Ağa b. ( ) ve sadrî sagīr oğlu Mehmed’e münhasıra olup ba‘dehâ mezbûr Hasan Ağa dahi vefât edip ancak verâseti kızı oğlu sagīr-i mezbûr Mehmed’e münhasıra olduğu şer‘an sâbit ve zâhir oldukdan sonra sagīr-i mezbûr Mehmed’in babası ve velîsi olan mezbûr Halil Ağa meclis-i şer‘-i hatîr-i lâzımü’t-tevkīrde müteveffât-ı mezbûre Sâliha Hatun’un mu‘takaları olan işbu bâ‘iseteyi’l-kitâb Gülgûn bt. Abdullah ve Belkıs bt. Abdullah mahzarlarında bi’l-vesâye üzerlerine da‘vâ ve takrîr-i kelâm edip mezbûretân Gülgûn ve Belkıs müteveffâ-yı mezbûr Hasan Ağa’nın hîn-i vefâtında hizmetinde olmağın muhallefâtından her biri ikişer minder ve dörder yasdık ve birer mâ‘i velence ve bir köhne seccâde ve üçer sahan ve bir tencere ve bir leğen ve birer ibrik ve birer tepsi ve bir güğümün[ü] ahz ü kabz etmeleriyle eşyâ-yı mezbûreyi mezbûretândan da‘vâ ve taleb eylediğimde her biri bana teslîmden imtinâ‘ eder suâl olunup eşyâ-i mezbûreyi bana teslîme mezbûretâna tenbîh olunmak matlûbumdur dedikde gıbbe’s-suâl mezbûretân Gülgûn ve Belkıs cevâblarında ber-vech-i muharrer biz müteveffâ-yı mezbûr Hasan Ağa’nın hayatında hizmetinde iken her birimize eşyâ-i mezbûreleri minvâl-i meşrûh üzre hayatında bize hîbe ve teslîm biz dahi meclis-i hîbede ittihâb ve kabz ve kabûl etmişidik deyü def‘le mukābele eylediklerinde gıbbe’l-istintâk [56a] ve’l-inkâr mezbûretân Gülgûn ve Belkıs’dan müdde‘âlarını mübeyyine beyyine taleb olundukda udûl-i Müslimînden olup mahalle-i mezbûre sükkânından Süleyman Beşe b. Muslı ve Salmatomruk’da Paşa odalarında sâkin Ahmed b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Hasan Ağa hayatında bizim huzûrumuzda mezbûretân Gülgûn ve Belkıs’dan her birine eşyâ-i memlûkesinden ikişer minder ve dörder yasdık ve bir mâ‘i velence ve bir köhne seccâde ve üçer sahan ve birer tencere ve birer leğen ve bir ibrik ve birer tepsi ve güğümün[ü] hîbe ve teslîm ve mezbûretân Gülgûn ve Belkıs dahi meclis-i hîbede ittihâb ve kabz ve kabûl eylediler biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye ettiklerinde şâhidân-ı mezbûrânın keyfiyet-i hâl[lerini] suâl için kıbel-i şer‘den irsâl olunan Mevlânâ Sunullah Efendi b. Ali evvelâ zikrolunan Paşa odalarına varıp ahâlîsinden İmâm Zeynelabidin Efendi ve Derviş Beşe ve Mehmed ve Süleyman Bey nâm kimesnelerden şâhid-i mezbûr Ahmed’in keyfiyet-i hâlini suâl eyledikde her biri mezbûr Ahmed için adl ve makbûlü’ş-şehâdedir deyü haber verdiklerini ve sâniyen zikrolunan Debbağzâde Mahallesi’ne varıp ahâlîsinden İmâm Abdullah Efendi ve Attar Hasan Çelebi ve Ahmed Beşe nâm kimesnelerden şâhid-i mezbûr Süleyman’ın keyfiyet-i hâlini suâl eyledikde onlardan her biri dahi mezbûr Süleyman için adl ve makbûlü’ş-şehâdedir deyü haber verdiklerini mevlânâ-yı mezbûr mahâllinde tahrîr ba‘dehû ma‘an irsâl olunan Molla Hasan ile meclis-i şer‘a gelip alâ-vukū‘ihî inhâ ve takrîr etmeleriyle şâhidân-ı [mezbûrân] ta‘dîl ve tezkiye olunup şehâdetleri makbûle olmağın mûcebince mezbûr Halil Ağa bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’r-râbi‘ ve’l-işrîn min-Saferü’l-hayr li-sene ihdâ ve tis‘în ve elf. Şuhûdü’l-hâl: es-Sâbıkūn.