Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 243 Hüküm no: 215 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. İsmail’in evini Mustafa Efendi b. Sinan’a sattığı Mahmiye-i İstanbul’da Hüsrev Paşa Türbesi kurbünde Kādıasker Mehmed Efendi Mahallesi sükkânından Hüseyin Ağa b. İsmail nâm kimesne meclis-i şer‘de işbu bâ‘isü’l-kitâb Mustafa Efendi b. Sinan nâm [kimesne] tarafından husûs-ı âti’l-beyâna vekîl olduğu Mustafa b. Hızır ve el-Hâc Hasan b. Hüseyin nâm kimesneler şehâdetleri ile şer‘an sâbit olan Ali Çavuş b. Hızır nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm olup mahalle-i mezbûrede vâki‘ iki tarafdan müvekkil-i mezbûr Mustafa Efendi mülkü ve bir tarafdan Süleyman Beşe veresesi mülkleri ve bir tarafdan tarîk-ı âm ile mahdûd hâriciyede fevkānî bir bâb odayı ve dâhiliyede tahtânî iki bâb odayı ve bir kileri ve fevkānî bir bâb odayı ve bir mahtabı ve bi’r-i mâyı ve bir mikdâr cüneyneyi müştemil olan mülk menzilimi bi-cümleti’t-tevâbi‘ ve’l-levâhık ve’l-merâfık tarafeynden îcâb ve kabûlü hâvî bey‘-ı kat‘î ile elli bin akçeye müvekkil-i mezbûr Mustafa Efendi’ye bey‘ ve teslîm ol dahi iştirâ ve tesellüm ve kabûl eylediğinden sonra semeni olan meblağ-ı mezbûr elli bin akçeyi mezbûr Mustafa Efendi yedinden tamamen ahz ü kabz eyledim min-ba‘d menzil-i mezbûrda benim kat‘a alâka ve medhalim kalmayıp mezbûr Mustafa Efendi’nin mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb [ketb olundu]. Fî 26 min-Saferü’l-hayr sene 1091. Şuhûdü’l-hâl: Mustafa Efendi el-imâm, Abdurrahman? Çelebi b. ( ), Abdullah Çelebi b. Ahmed, Hasan Efendi el-imâm, el-Hâc Hüseyin b. Abdullah, <> İshak Çelebi b. Eyüb, Yedekçizâde Mehmed Ağa, Mahmud Çelebi b. İbrahim.