Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 245 Hüküm no: 217 Orijinal metin no: [56b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Çavuş b. Mehmed’in alacaklısı olduğu borcu kefil olan Mehmed Çorbacı b. İsa’dan tahsil etmesi Dergâh-ı âlî yeniçerilerinin on yedinci çerge odası ahâlîsinden işbu bâ‘isü’l-kitâb Halil Çavuş b. Mehmed meclis-i şer‘-i şerîf-i enverde sâbıkā Budin Ağası olan Mehmed Çorbacı b. İsa mahzarında üzerine da‘vâ ve takrîr-i kelâm edip Vilâyet-i Rumeli’nde Brut? kasabasında sâkin yine Dergâh-ı âlî yeniçerileri çavuşlarından Abdülkadir Çavuş b. Mustafa zimmetinde cihet-i karz-ı şer‘îden iki yüz esedî guruş hakkım olup bundan akdem mahrûse-i Edirne’de meblağ-ı mezbûrdan elli esedî guruşunu yedinden ahz ü kabz edip bâkī yüz elli esedî guruş hakkıma mezbûr Mehmed Çorbacı emir ve kabûlü hâviye kefâlet-i sahîha-i şer‘iye ile kefîl olmağın suâl olunup bi-hükmi’l-kefâle meblağ-ı mezbûrun alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına beyyine taleb olundukda udûl-i Müslimînden olup zümre-i mezbûreden yirminci [yirmi] altıncı bölüğüne mahsûs oda ahâlîsinden İbrahim Çavuş b. Halil ve zikrolunan on yedinci çerge odası ahâlîsinden Ahmed Çavuş b. Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ işbu müdde‘î-i mezbûr Halil Çavuş’un mezbûr Abdülkadir Çavuş b. Mustafa zimmetinde cihet-i karz-ı şer‘îden olup kabzını i‘tirâf eylediği elli esedî guruşdan bâkī yüz elli esedî guruş hakkına işbu mezbûr Mehmed Çorbacı mahrûse-i Edirne’de bizim huzûrumuzda emir ve kabûlü hâviye kefâlet-i sahîha-i şer‘iye ile kefîl olup biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye ettiklerinde şâhidân-ı mezbûrânı ta‘dîl ve tezkiye için savb-ı şer‘den irsâl olunan Mustafa Efendi b. Abdülaziz zikrolunan yirmi altıncı bölüğün odasına varıp ahâlîsinden Ali Odabaşı b. Mahmud ve Vekîlharc Mehmed Beşe b. Hamza ve Aşçı Ali Beşe b. Hüseyin ve Mehmed Beşe b. Ali ve Haydar Beşe b. Ebûbekir ve Mehmed Beşe b. Salih ve Hasan Beşe b. Ahmed ve Receb Beşe b. Abdullah ve Mehmed Beşe b. Abdullah’dan alenen mezbûr İbrahim Çavuş’un keyfiyet-i hâlini istihbâr etdikde mezbûr[un] adl ve makbûlü’ş-şehâde olduğunu her biri haber verdikden sonra zikrolunan çerge odasına varıp ahâlîsinden Halil Odabaşı b. Mustafa ve Bâzcı Mehmed Beşe b. Pîrî ve Ahmed Beşe b. Receb ve Mustafa Beşe b. Abdullah ve Şa‘ban Ağa b. Hüseyin ve Hasan Beşe b. Mehmed ve Ahmed Beşe b. Ebûbekir ve Veli Beşe b. Ahmed’den mezbûr Ahmed Çavuş’un keyfiyet-i hâlini alenen istifsâr etdikde mezbûrun adl ve makbûlü’ş-şehâde olduğunu her biri haber verdiğinden sonra Mustafa Çavuş b. Ahmed ve Yusuf b. Abdullah ve Ahmed b. Hüseyin ve Mehmed Beşe b. Mustafa ve Ali Beşe b. İbrahim ve Halil Beşe b. Mustafa nâm kimesnelerden [57a] şâhidân-ı mezbûrân sırren dahi suâl olunup mezbûrânın adl ve makbûlü’ş-şehâde olduklarını her biri haber vermeğin vâki‘ hâli mezbûr Mustafa Efendi mahâllinde tahrîr ba‘dehû [ma‘an] irsâl olunan Abdullah b. Abdurrahman ile meclis-i şer‘a gelip inhâ ve takrîr etmeğin mezbûrân sırren ve alenen ta‘dîl ve tezkiye olunmağla şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâdis ve’l-işrîn min-Saferü’l-hayr li’s-seneti’l-mezbûre. Şuhûdü’l-hâl: Musa Efendi b. ( ), Mehmed b. Haydar, Ramazan Beşe b. ( ), Hasan Beşe b. Ahmed, Ebûbekir Efendi b. ( ), Sarrâcbaşı Mustafa Ağa b. ( ), Mehmed Ağa Bâkīkulu, Ahmed Ağa Azeb Ağası, Ahmed Ağa Çorbacı, Osman Ağa Çorbacı.