Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 246 Hüküm no: 218 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasnaki v. Kostanti’nin evini Kudüs Patriği Dosmensus v. Nikola’ya sattığı Mahmiye-i İstanbul’da Tahtaminâre Mahallesi’nde sâkin Hasnaki v. Kostanti nâm zimmî meclis-i şer‘-i hatîr-i lâzımü’t-tevkīrde hâlâ Kuds-i Şerîf keferesi patriki olan işbu bâ‘isü’s-sifr Dosmensus v. Nikola tarafından husûs-ı âti’l-beyâna vekîl olduğu Yamandi v. Kosta ve Toveş v. ( ) nâm zimmîler şehâdetler[iyle] şer‘an sâbit olan Papa (...) v. Duka muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrede vâki‘ bir tarafdan âhar mülkü ve bir tarafdan Hristodali nâm zimmî mülkü ve bir tarafdan Kuds-i Şerîf vakfı olan odalar ve bir tarafdan tarîk-ı âm ile mahdûd olup tûlen kırk bir zirâ‘ ve arzan beş zirâ‘ bi-hesâb-ı terbî‘î iki yüz beş zirâ‘ arsa üzerinde fevkānî bir bâb odayı ve tahtânî bir bâb odayı ve bir su kuyusunu ve zât-ı eşcâr-ı müsmire ve gayr-ı müsmire hadîkayı müştemil olan mülk menzilimi cümle tevâbi‘iyle tarafeynden îcâb ve kabûlü hâvî bey‘-ı kat‘î ile dört yüz yirmi esedî guruşa müvekkil-i merkūm Dosmensus Patrik’e bey‘ ve teslîm ol dahi iştirâ ve tesellüm eylediğinden sonra semeni olan meblağ-ı mezbûr dört yüz yirmi esedî guruşu patrik-i mezbûr yedinden tamamen ahz ü kabz eyledim min-ba‘d menzil-i mahdûd-ı mezbûrda kat‘a alâka ve medhalim kalmayıp patrik-i mezbûrun mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâdî ve’l-işrîn min-Saferü’l-hayr li-sene ihdâ ve tis‘în ve elf. Şuhûdü’l-hâl: Mustafa Efendi b. Abdülhalim el-imâm, Mehmed Beşe b. Abbas, Durmuş Beşe b. ( ), Mustafa Beşe b. Muharrem, Süleyman Çelebi b. Haydar.