Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 247 Hüküm no: 219 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Hasan ile kocası Halil b. İbrahim’in muhâlaa yoluyla boşandıkları <> Medîne-i Ebî Eyyûbi’l-Ensârî -radıye anhü’l-Bârî- muzâfâtından kasaba-i Hasköy’de el-Hâc Şa‘ban Mahallesi sâkinelerinden olup zâtını ma‘rifet-i şer‘iye ile ârifân Mustafa Çelebi b. İbrahim ve Halil Çelebi b. Mustafa ta‘rîfleriyle mu‘arrefe olan İsmihan bt. Hasan nâm hatun meclis-i şer‘-i şerîf-i enverde zevc-i muhâlı‘ı işbu râfi‘u’l-kitâb Halil b. İbrahim nâm kimesne mahzarında ikrâr-ı tâm ve takrîr-i kelâm edip mezbûr Halil zevcim olup zimmetinde mütekarrir ve ma‘kūdün-aleyh olan bin akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzre zevcim mezbûr Halil ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru ba‘de’l-kabûl hukūk-ı zevciyete müte‘allika âmme-i da‘vâdan her birimiz âharı ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Saferü’l-hayr li-sene ihdâ ve tis‘în ve elf. Şuhûdü’l-hâl: Mustafa Çelebi b. ( ), Halil Çelebi b. ( ), Mehmed Çelebi b. Haydar, Ahmed Çelebi b. Piyale.