Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 253 Hüküm no: 224 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocasından intikal eden evdeki hissesini kocasının büyük oğlu Yahya Efendi’ye sattığı halde parasını alamayan Safiye Hatun’a ilgili meblağın Yahya Efendi tarafından ödendiği Mahmiye-i İstanbul’da Molla Fenârî Mahallesi sükkânından iken bundan akdem vedâ‘-ı âlem-i fânî eden merhûm Hekîmbaşı Salih Efendi b. Nasrullah’ın verâseti zevce-i metrûkesi Safiye Hatun bt. Salahaddin ile sulbî kebîr oğulları umdetü’l-ulemâi’l-izâm Yahya Efendi ve Derviş Ağa’ya ve sulbiye kebîre kızları Merdümhan ve Münevvere’ye ve sagīre kızları Rahime ve Emetullah’a münhasıra olup kable’l-kısme mezbûre Emetullah dahi fevt olup verâseti vâlidesi mezbûre Safiye ile li-ebeveyn kız karındaşı merkūme Rahime’ye ve li-eb er karındaşları mûmâ-ileyhimâ Yahya Efendi ve Derviş Ağa’ya ve li-eb kız karındaşları mezkûretân Fâtıma ve Merdümhan ve Münevvere’ye münhasıra ve tashîh-i mes’elesi bi-hükmi’l-münâsahati’ş-şer‘iye üç bin yirmi dört sehimden olup sihâm-ı mezbûreden dört yüz yirmi yedi sehmi mezbûre Safiye Hatun’a ve altışar yüz on ikişer sehmi müşârün-ileyhimâ Yahya Efendi ve Derviş Ağa’dan her birine ve dört yüz kırk bir sehmi mezbûre Rahime’ye ve üçer yüz sekizer sehmi mezbûrât Fâtıma ve Merdümhan ve Münevvere’den her birine isâbet eylediği lede’ş-şer‘i’l-enver zâhir ve mukarr[er] oldukdan sonra mezbûre Safiye Hatun tarafından zikri âtî husûsa vekîl olduğunu iddi‘â eden Mehmed Efendi b. Ali meclis-i şer‘-i şerîf-i enverde sahibü hâze’l-kitâb müşârün-ileyh Yahya Efendi mahzarında üzerine da‘vâ ve takrîr-i kelâm edip arsasının merhûm el-Hâc Bayram vakfına senede üç yüz akçe mukāta‘a-i kadîmesi olup mahalle-i mezbûrede vâki‘ bir tarafı merhûm Hüseyin Paşa veresesi tasarruflarında olan saray ve bir tarafı Kösec Sinan vakfından olup Kapıcı Kenan Bey ve zevcesi Âmine Hatun ve Bali Çelebi ve Kapıcı Hüseyin Bey tasarruflarında olan odalar ve bir tarafı Mustafa Bey tasarrufunda olan arsa ve bir tarafı ba‘zan Kilâr kethudâsı Mustafa Ağa veresesi ve ba‘zan tarîk-ı âm ile mahdûd hâriciyesinin süflâsı ahır [ve] bir arpa anbârı ve bi’r-i mâ ve vustâsı üç bâb oda ve kenîf ve ulyâsı üç bâb oda ve bir mâbeyn odası ve kenîf ve orta sofa ve dâhiliyesinin süflâsı iki oda ve bir kiler ve bir matbah ve câmekânlı hamam ve bi’r-i mâ ve cüneyne ve kenîf ve havlu ve fevkānîsi bir kebîr oda ve bir mâbeyn odası ve iki orta sofa ve bir sagīr oda ve bi’r-i mâyı müştemil menzil merhûm-ı mezkûr Salih Efendi’nin ile’l-vefât silk-i mülkünde münselik olup ba‘de-vefâtihî veresesine ırsen isâbet etdikden sonra menzil-i mezbûr nidâ ve müzâyede olunup ba‘de-inkıtâ‘ı’r-rağbe semeni beş yük kırk bin akçe idüğü dahi zâhir ve müte‘ayyin olmağın hâlâ ben vekâlet-i mahkiyem hasebiyle menzil-i mezbûrda bi-tarîkı’l-münâsaha müvekkile-i mezbûre Safiye Hatun’un bâlâda tahrîr olunan dört yüz yirmi yedi sehim hisse-i şâyi‘asını bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık müşârün-ileyh Yahya Efendi’ye semen-i misli olan altı yüz doksan yedi buçuk esedî guruşa tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile bey‘ ve temlîk ve teslîm ve arsasından hissesini dahi izn-i mütevellî ile meccânen ferâğ ve tefvîz ol dahi iştirâ ve kabûl ve tefevvüz ve tesellüm etmiş-iken hâlâ semen-i mezbûru bana edâdan imtinâ‘ eder suâl olunup semen-i mezbûru bana edâ ve teslîm etmek üzre müşârün-ileyh Yahya Efendi’ye tenbîh olunmak matlûbumdur dedikde gıbbe’s-suâl müşârün-ileyh Yahya Efendi cevâbında hisse-i mezkûreyi semen-i mezbûra [60a] iştirâ ve arsasından dahi hissesini tefe[vvu]z ve kabûlünü ikrâr lâkin müdde‘î-i mezbûrun vekâlet-i meşrûhasını bi’l-külliye inkâr edicek müdde‘î-i mezbûrdan vekâlet-i mezbûreyi mübeyyine beyyine taleb olundukda zât-ı mezbûreyi ma‘rifet-i şer‘iye ile ârifân olan umdetü’s-sâdât es-Seyyid Abdülkerim Çelebi b. Salahaddin ve es-Seyyid Salahaddin Çelebi b. es-Seyyid Fethullah li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ merhûm-ı mezbûr Salih Efendi’nin zevce-i menkûhası mezbûre Safiye Hatun bt. Salahaddin bâlâda tahdîd ve tahrîr olunan menzil-i mezbûrdan bi-hükmi’l-münâsahati’ş-şer‘iye kendüye isâbet eden üç bin yirmi dört sehimden dört yüz yirmi yedi sehim hisse-i şâyi‘asını semen-i mezkûra müşârün-ileyh Yahya Efendi’ye bey‘ ve temlîk ve arsasından hissesini dahi bâ-izn-i mütevellî meccânen ferâğ ve tefvîz ve semeni kabz ve kendüye îsâle ve husûs-ı mezbûra mütevakkıf olduğu umûrun küllîsine bizim huzûrumuzda merkūm Mehmed Efendi b. Ali’yi tarafından vekîl ve nâib-i menâb nasb ve ta‘yîn edip ol dahi vekâlet-i mezbûreyi kabûl ve merâsimini kemâ-yenbagī edâya ta‘ahhüd eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle sübût-ı vekâlete ba‘de’l-hükm ve’t-tenbîh mezbûr Mehmed Efendi meclis-i şer‘-i kavîmde müşârün-ileyh Yahya Efendi mahzarında bi’l-vekâle ikrâr-ı tâm ve takrîr-i kelâm edip semen-i mezbûr altı yüz doksan yedi buçuk esedî guruşu müşârün-ileyh Yahya Efendi yedinden vekâlet-i mahkiyem hasebiyle bi’t-tamam ve’l-kemâl ahz ü kabz ve tesellüm eyledim ba‘de’l-yevm müvekkile-i mezbûre Safiye Hatun’un hisse-i meşrûhatü’l-beyânı mûmâ-ileyh Yahya Efendi’nin mülk-i müşterâsı ve arsasında olan hissesi dahi hakk-ı müfevvazıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-âşir min-Saferü’l-hayr li-sene ihdâ ve tis‘în ve elf. Şuhûdü’l-hâl: es-Seyyid Es‘ad Efendi b. Mecdîzâde, fahrü’l-kuzât İbrahim b. Mehmed, es-Seyyid Hüseyin Efendi [b.] es-Seyyid Sadi Efendi, es-Seyyid Mahmud Efendi [b.] Hamidîzâde Çelebi, es-Seyyid Ni‘metu[llah] Çelebi [b.] Hasan Ağa, es-Seyyid Ahmed Çelebi [b.] Küçük Emir, el-Hâc İbrahim Çelebi b. Hüseyin Hamidîzâde, Muharrem Çelebi b. Veli, Mehmed Emin Ağa b. Ali.