Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 255 Hüküm no: 225 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babasından intikal eden evdeki hissesini kardeşi Yahya Efendi’ye sattığı halde parasını alamayan Rahime Hatun’a ilgili meblağın Yahya Efendi tarafından ödendiği Mahmiye-i İstanbul’da Molla Fenârî Mahallesi’nde sâkin iken bundan akdem vedâ‘-ı âlem-i fânî eden merhûm Hekîmbaşı Salih Efendi b. Nasrullah’ın verâseti zevce-i menkûhası Safiye Hatun bt. Salahaddin ile sulbî kebîr oğulları umdetü’l-ulemâi’l-kirâm Yahya Efendi ve Derviş Ağa’ya ve sulbiye kebîre kızları Merdümhan ve Münevvere’ye ve sagīre kızları Rahime [ve] Emetullah’a münhasıra olup kable’l-kısme mezbûre Emetullah dahi fevt olup verâseti vâlidesi mezbûre Safiye Hatun ile li-ebeveyn kız karındaşı mezbûre Rahime’ye ve li-eb er karındaşları mûmâ-ileyhimâ Yahya Efendi ve Derviş Ağa’ya ve li-eb kız karındaşları mezkûrât Fâtıma ve Merdümhan ve Münevvere’ye münhasıra ve tashîh-i mes’elesi bi-hükmi’l-münâsahati’ş-şer‘iye üç bin yirmi dört sehimden olup sihâm-ı mezbûreden dört yüz yirmi sehmi mezbûre Safiye Hatun’a ve altışar yüz on altışar sehmi müşârün-ileyhimâ Yahya Efendi ve Derviş Ağa’dan her birine ve dört yüz kırk bir sehmi mezbûre Rahime’ye ve üçer yüz sekiz[er] sehmi mezbûrât Fâtıma ve Merdümhan ve Münevvere’den her birine isâbet eylediği lede’ş-şer‘i’l-enver zâhir ve mukarr[er] oldukdan sonra sinn ve cüssesinin bulûğa tahammülü olmağla bulûğunu mu‘terife ve rüşdü zeyl-i kitâbda muharrerü’l-esâmî Müslimîn ihbârlarıyla zâhir ve müte‘ayyen olan mezbûre Rahime tarafından zikri âtî husûsa vekîl olduğunu iddi‘â eden Mehmed Efendi b. Ali meclis-i şer‘-i hatîr-i lâzımü’t-tevkīrde sahibü hâze’l-kitâb müşârün-ileyh Yahya Efendi mahzarında üzerine da‘vâ ve takrîr-i kelâm edip arsasının merhûm el-Hâc Bayram vakfına senede üç yüz akçe mukāta‘a-i kadîmesi olup mahalle-i mezbûrede vâki‘ bir tarafı merhûm Hüseyin Paşa veresesi tasarruflarında olan saray ve bir tarafı Kösec Sinan vakfından olup Kapıcı Kenan Bey ve Âmine Hatun ve Bali Çelebi ve Kapıcı Hüseyin Bey tasarruflarında olan odalar ve bir tarafı Mustafa Bey tasarrufunda olan arsa ve bir tarafı ba‘zan Kilâr kethudâsı Mustafa Ağa veresesi [60b] ve ba‘zan tarîk-ı âm ile mahdûd hâriciyesinin süflâsı bir ahır ve arpa anbârı ve bi’r-i mâ ve vustâsı üç bâb oda ve kenîf ve ulyâsı üç bâb oda ve bir mâbeyn odası ve kenîf ve orta sofa ve dâhiliyesinin süflâsı iki oda ve bir kiler ve bir matbah ve câmekânlı bir hamam ve bi’r-i mâ ve cüneyne ve kenîf ve havlu ve ulyâsı bir kebîr oda ve bir mâbeyn odası ve iki orta sofa ve bir sagīr oda ve bi’r-i mâyı müştemil menzil merhûm-ı mezkûr Salih Efendi’nin ile’l-vefât silk-i mülkünde münselik olup ba‘dehû veresesine isâbet etdikden sonra menzil-i mezbûr nidâ ve müzâyede olunup ba‘de-inkıtâ‘ı’r-rağbe semeni beş yük kırk bin akçe idüğü dahi zâhir ve müte‘ayyin olup ve ben zikri âtî husûsa vekîl olmağla müvekkilem mezbûre Rahime’nin bi-tarîkı’l-münâsaha menzil-i mezbûrdan olan dört yüz kırk bir sehim hisse-i şâyi‘asını müşârün-ileyh Yahya Efendi’ye semen-i misli olan yedi yüz on yedi buçuk esedî guruşa tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile bey‘ ve temlîk ve arsasından dahi hisse-i mu‘ayyenesini izn-i mütevellî ile meccânen ferâğ ve tefvîz ol dahi iştirâ ve kabûl ve tefevvüz ve tesellüm etmiş-iken semen-i mezbûr ile müvekkilem mezkûreye babası müteveffâ-yı mezbûr ile mezkûr Emetullah’dan hesâb-ı mezkûr ile bi’l-irsi’ş-şer‘î isâbet eden hisse-i mu‘ayyene-i ma‘lûmesini bana edâ ve teslîmden imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Yahya Efendi cevâbında fi’l-hakīka mezkûre Rahime’nin menzil-i mezbûrede olan hisse-i mesfûresini [semen-i] mezkûra iştirâ ve semen-i mezbûre ve hisse-i irsiyesi hâlâ edâ ve teslîmi lâzım deyni idüğünü ikrâr lâkin müdde‘î-i mezbûrun ber-vech-i meşrûh vekâletini inkâr edicek müdde‘î-i mezbûrdan müdde‘âsına beyyine taleb olundukda zât-ı mezbûreyi ma‘rifet-i şer‘iye ile ârifân tüccâr-ı zevi’l-ihtirâmdan olan udûl-i Müslimînden es-Seyyid Abdülkerim Çelebi b. Salahaddin ve es-Seyyid Salahaddin Çelebi b. es-Seyyid Fethullah li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr Salih Efendi’nin kızı mezbûre Rahime Hatun müteveffâ-yı mezbûrenin [mezbûrun] terekelerinden olup hudû[d]-ı mezkûre ile mahdûd olan menzilden hesâb-ı mezkûr üzre hisse-i irsiyesini meblağ-ı mezbûra bey‘ ve semen-i mezkûre ile sâir terekesinden hisse-i irsiyesini vâzı‘u’l-yed olan müşârün-ileyh Yahya Efendi’den taleb ve da‘vâ ve ahz ü kabz ve kendüye îsâle ve husûs-ı mezbûra müte‘allika âmme-i da‘vâdan zimmetini ibrâya bizim huzûrumuzda müdde‘î-i mezbûr Mehmed Efendi b. Ali’yi tarafından vekîl nasb ve ta‘yîn edip ol dahi vekâlet-i mezbûreyi kabûl ve merâsimini edâya kemâ-yenbagī ta‘ahhüd eyledi [biz bu husûsa] bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle sübût-ı vekâlete ba‘de’l-hükm mezbûr Mehmed Efendi meclis-i şer‘de mûmâ-ileyh Yahya Efendi mahzarında ikrâr ve takrîr-i kelâm edip menzil-i mezbûrda müvekkilem mezbûrenin bey‘ olunan hissesinin semeni olan meblağ-ı mezbûr yedi yüz on yedi buçuk esedî guruş ile babasından bi’l-irsi’ş-şer‘î isâbet eden hissesinden hâl-i sıgārında nafaka-i mefrûzasına verilen ma‘lûmü’l-mikdâr meblağdan bâkī dokuz yüz elli iki esedî guruş vermişizdir mezbûr Emrullah’dan [mezbûre Emetullah’dan] ırsen isâbet eden dört yüz yetmiş beş esedî guruş ki min-haysü’l-mecmû‘ iki bin yüz kırk dört buçuk esedî guruşu vekâlet-i mahkiyem hasebiyle mûmâ-ileyh Yahya Efendi yedinden bi’t-tamam ve’l-kemâl ahz ü kabz ve tesellüm edip müvekkil-i mûmâ-ileyh Yahya Efendi mukaddemâ müvekkilem mezbûrenin sagīre hâlinde nafaka-i mefrûzasından otuz dört ay kendi mâlından beher mâh on beşer guruşdan cem‘an beş yüz on guruş dahi masrûfu olmağla zikrolunan beş yüz on guruş mutâlebesinden mezbûre Rahime’yi ibrâ ve ıskāt etdikde ben-dahi vekâlet-i mahkiyem hasebiyle menzil-i mezbûre semenine ve müteveffâ-yı mezbûrânın ve bi’l-cümle ism-i mâl ıtlâk olunur terekelerine müte‘allika müşârün-ileyh Yahya Efendi’yi ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm müvekkilem mezbûrenin mûmâ-ileyh Yahya Efendi ile dahi [müve]kkilem mezbûr ile kat‘a da‘vâ ve nizâ‘ı kalmadı menzil-i mezbûrda olan hisse-i irsiyesi müşârün-ileyh Yahya Efendi’nin mülk-i müşterâsıdır ve arsasında olan hissesi hakk-ı müfevvazıdır keyfe[mâ] yeşâ’ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-âşir min-Saferü’l-hayr li-sene ihdâ ve tis‘în ve elf. Şuhûdü’l-hâl: es-Sâbıkūn.