Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 258 Hüküm no: 226 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şebrûz bt. Abdullah’ın Salih Çelebi b. Nasuh’u vasiyetini yerine getirmek üzere vasî tayin ettiği Husûs-ı âti’l-beyânın mahâllinde tahrîri iltimâs olunmağın savb-ı şer‘ kıbelinden irsâl olunan Mevlânâ Hüseyin Efendi b. Himmet mahmiye-i İstanbul’da Beyceğiz Mahallesi’nde sâkin el-Hâc Salih Çelebi b. Nasuh nâm kimesnenin menziline varıp zeyl-i kitâbda muharrerü’l-esâmî olan Müslimîn huzûrlarında akd-i meclis-i şer‘-i mübîn eyledikde mahalle-i mezbûrede sâkine Şe[b]rûz bt. Abdullah nâm hatun meclis-i ma‘kūd-ı mezbûrda ber-vech-i âtî vesâyâsını tenfîze vasîyy-i muhtâr nasb ve ihtiyâr eylediği işbu bâ‘isü’l-kitâb mezbûr el-Hâc Salih mahzarında bi-tav‘ihâ ikrâr ve takrîr-i kelâm edip küllü nefsin zâikatü’l-mevt ve küllü hayyin yülâkīhi’l-fevt fehvâsınca ben kazâ-i nahb ve likā-i Rabb eylediğimde mecmû‘-ı nakd-i terekem olan yüz esedî guruşdan üç bin yedi yüz akçesi hîn-i vefâtımda techîz ve tekfînime ve üçüme ve yedime ve kırkıma ve yılıma har[c] ve sarf oluna ve iki bin akçesi dahi ıskāt-ı salâtım için verile ve üç yüz akçesi dahi bana telkīn eden kimesneye verile ve bunlardan bâkī kalan altı bin akçe dahi vakfım olup senede onu on bir hesâbı üzre yed-i mütevellî ile istirbâh olunup fâidesinden hâsıl olan altı yüz akçenin üç yüz akçesine hâlâ mahalle-i mezbûre imâmı olan Veli Efendi mutasarrıf olup mukābelesinde beher yevm üç İhlâs-ı Şerîf ve bir Fâtiha-i Şerîf tilâvet edip sevâbını rûhuma ihdâ eyleye ve yüz elli akçesine dahi senede birer hatm-i şerîf tilâvet ettirile ve yüz elli akçesi cihet-i tevliyet olup mütevellî olanlar mutasarrıf ola ve mezbûr Veli Efendi’nin vefâtından sonra Beyceğiz Mahallesi’nde her kim imâm olursa ber-vech-i muharrer beher yevm üçer İhlâs-ı Şerîf ve birer Fâtiha-i Şerîf tilâvet edip mukābelesinde zikrolunan üç yüz akçeye mutasarrıf ola ve vakf-ı mezbûra mezbûr el-Hâc Salih Çelebi hayatda oldukça mütevellî ola vefâtından sonra evlâdına ve evlâd-ı evlâdına ve evlâd-ı evlâdına meşrûta ola ve ba‘de’l-inkırâz mahalle-i mezbûrede imâm olan kimesne ahâlî-i mahalle ma‘rifetiyle mütevellî ola ve ahâlî-i mahalle hasbî nâzır olalar ve kezâlik vefatımdan sonra esâs-ı beyte müte‘allika olan eşyâ-i memlûkemden bir sîm ön kuşağım ve üçer ayaklı yanları incili ve ortası la‘l ve göbeği la‘l altından masnû‘ bir çift küpem Hanife bt. Abdullah nâm hatuna verile ve rebîbem Fâtıma bt. İsmail nâ[m] hatuna dokuz altın düğmeli bir âteşî atlâs kaftanım verile ve mezbûre Fâtıma’nın sadriye kızı Sâliha’ya bir kaftanlık zincir-bâf al dîbâm verile ve müdebberem olan Timurhan bt. Abdullah’a dahi bir kebe ve bir yorgan ve bir yasdık verile ve Seriz Usta’ya dahi bir minder ve bir yasdık ve bir yorgan verile ve Sâliha Hatun’a bir yorgan ve bir minder ve bir yasdık ve bir baklava tepsisi verile ve bir kaliçem dahi zikrolunan Beyceğiz Mahallesi mescid-i şerîfinde ferş olunup üzerinde edâ-i salât oluna ve hâlâ sâkine olduğum menzilin sahibesi olan Rukiye Hatun’a bir beyâz kutnu kaftanım verile ve hîn-i vefâtımda mezbûre Rukiye’nin menzilinde bulunan zehâirin cümlesi mezbûre Rukiye’nin ola ve bu vasiyet ve ber-vech-i muharrer mecmû‘unun tenfîzine mezbûr el-Hâc Salih Çelebi’yi vasîyy-i muhtâr nasb ve ta‘yîn eyledim dedikde ol dahi vesâyet-i mezbûreyi kabûl ve merâsimini edâya ta‘ahhüd ve iltizâm etmeğin husûs-ı mezbûru mevlânâ-yı mezbûr mahâllinde vukū‘u üzre tahrîr ba‘dehû ma‘an irsâl olunan Mehmed Çelebi b. el-Hâc Abbas ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâdis aşer min-Saferü’l-hayr li-sene ihdâ ve tis‘în ve elf. Şuhûdü’l-hâl: Hasan Efendi b. Davud, Ali Beşe b. Yusuf, Mustafa Çelebi b. Mahmud, Ali Efendi b. ( ), el-Hâc Yusuf [b.] Abdullah, Mustafa Beşe b. Mehmed.