Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 259 Hüküm no: 227 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şebruz bt. Abdullah’ın vasiyetnamesinde zikrettiği nakit ve eşyası dışında başka bir malı olmadığını beyan ettiği Husûs-ı âti’l-beyânın mahâllinde tahrîri iltimâs olunmağın kıbel-i şer‘-i mübînden irsâl olunan Hüseyin Efendi b. Himmet mahmiye-i İstanbul’da Beyceğiz Mahallesi’nde sâkin el-Hâc Salih Çelebi b. Nasuh nâm kimesnenin menziline varıp zeyl-i kitâbda muharrerü’l-esâmî olan Müslimîn huzûrunda akd-i meclis-i şer‘-i şerîf eyledikde mahalle-i mezbûrede sâkine Şebrûz bt. Abdullah nâm hatun meclis-i ma‘kūd-ı mezbûrede işbu bâ‘isü’l-kitâb mezbûr el-Hâc Salih Çelebi mahzarında bi-tav‘ihâ ikrâr ve takrîr-i kelâm edip bundan akdem mezbûr el-Hâc Salih Çelebi’ye verdiğim vasiyetnâme hüccetinde tahrîr ettiğim nukūd ve eşyâdan mâ‘adâ üzerimde lâbis olduğum libâsımdan gayrı sâkine olduğum [61b] menzil içinde ve sâir yerde ism-i mâl ıtlâk olunur asla bir şey’im olmayıp eğer nakid ve eğer eşyânın cümlesi mezbûr el-Hâc Salih Çelebi’nindir benim kat‘a alâka ve medhalim yokdur dedikde gıbbe’t-tasdîkı’ş-şer‘î husûs-ı mezbûru mevlânâ-yı mezbûr mahâllinde tahrîr ba‘dehû ma‘an irsâl olunan Mehmed Çelebi b. el-Hâc Abbas ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâdis aşer min-Saferü’l-hayr li-sene ihdâ ve tis‘în ve elf. Şuhûdü’l-hâl: es-Sâbıkūn.