Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 260 Hüküm no: 228 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Halil ile kocası Hasan b. Mustafa’nın muhâlaa yoluyla boşandıkları Mahmiye-i İstanbul’da Karabaş Mahallesi’nde vâki‘ Hürrem Çavuş odalarının birinde sâkine Fâtıma bt. Halil nâm hatun tarafından husûs-ı âti’l-beyânı ikrâra vekîl olup zât-ı mezbûreyi ma‘rifet-i şer‘iye ile ârifân Mehmed Halîfe b. Mustafa el-müezzin ve Hüseyin b. Mustafa nâm kimesneler şehâdetleriyle şer‘an vekâleti sâbite olan Mehmed Bey b. el-Hâc Hüseyin meclis-i şer‘-i şerîf-i enverde müvekkile-i mezbûrenin zevc-i muhâlı‘ı işbu râfi‘u’l-kitâb el-Hâc Hasan b. Mustafa nâm kimesne mahzarında bi’l-vekâle ikrâr ve takrîr-i kelâm edip mezbûr el-Hâc Hasan müvekkilem mezbûrenin zevci olup târih-i kitâb günü müvekkilem mezbûre Fâtıma zevci mezbûr el-Hâc Hasan zimmetinde mütekarrir ve ma‘kūdün-aleyh olan altı yüz akçe mehr-i müecceli ve nafaka-i iddeti üzerlerine ve meûnet-i süknâsı dahi kendi üzerine olmak üzre zevci mezbûr el-Hâc Hasan ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru ba‘de’l-kabûl hukūk-ı zevciyete ve sâir beynlerinde cereyân eden ahz ü i‘tâya müte‘allika âmme-i da‘vâdan her biri âharı ibrâ-i âmm-ı kātı‘u’n-nizâ‘la ibrâ ve ıskāt edip min-ba‘d birbiriyle vechen mine’l-vücûh da‘vâ ve niz[â]‘ı yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-işrîn min-Saferü’l-hayr li-sene ihdâ ve tis‘în ve elf. Şuhûdü’l-hâl: Süleyman b. Kalâyî b. ( ), Mehmed Efendi [b.] Mustafa el-imâm, el-Hâc Ömer b. ( ) b. ( ), Osman b. Ali.