Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 264 Hüküm no: 234 Orijinal metin no: [62b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mustafa’nın Yusuf Bey b. Abdullah’a olan borcunu ödemesi Mahmiye-i İstanbul’da Tercüman Yunus Mahallesi’nde sâkin işbu bâ‘isü’l-kitâb Yusuf Bey b. Abdullah nâm kimesne mahfil-i kazâda Karabaş Mahallesi sâkinelerinden Şaşı Fâtıma bt. Mustafa muvâcehesinde üzerine da‘vâ ve takrîr-i kelâm edip mezbûre Fâtıma zimmetinde yedinde olan hüccet-i şer‘iye nâtıka olduğu üzre yedimden iştirâ ve kabz eylediği beynimizde ma‘lûm eşyâ bahâsından yüz elli buçuk guruş ve cihet-i karz-ı şer‘îden iki yüz dokuz guruş ki cem‘an üç yüz elli dokuz buçuk esedî guruş hakkım olup mukaddemâ meblağ-ı mezbûrun iki yüz kırk dört guruşunu yedinden ahz ü kabz eylediğimden sonra hâlâ bâkī kalan yüz on beş buçuk guruş ve yine iktirâz ve kabz ve istihlâk eylediği elli esedî guruş ve zevci Abdurrahman nâm kimesne zimmetinde dokuz buçuk guruş hakkım olmağla mezbûre Fâtıma üzerine havâle edip ol dahi havâle-i mezbûreyi kabû[l] eylediği dokuz buçuk guruş ve bir def‘a dahi karz-ı şer‘îden altı buçuk guruş ve yedimden müşterâ ve makbûz iki kaliçe semenlerinden on buçuk guruş min-haysü’l-mecmû‘ mezbûre Fâtıma zimmetinde hakkım olan yüz doksan iki esedî guruşun dört guruşu için mezbûre Fâtıma bana [63a] bir Mushaf-ı Şerîf’ini ve iki buçuk guruş için beynimizde ma‘lûm emti‘asını ve beş guruş bir rub‘u için bir yan kaliçesini ve iki guruş bir rub‘ nakid def‘ ü teslîm ben-dahi ber-vech-i muharrer ahz ü kabz edip cem‘an on dört guruşunu istifâ eylediğimden sonra zimmetinde yüz yetmiş sekiz esedî guruş bâkī kalmışidi hâlâ meblağ-ı bâkī-i mezbûru mezbûre Fâtıma’dan taleb ederim suâl olunsun dedikde gıbbe’s-suâl mezbûre Fâtıma cevâbında fi’l-hakīka kazıyye bâlâda tafsîli mürûr ettiği vech üzre olup müdde‘î-i mezbûr Yusuf Bey’e ba‘de-küllî hesâbin meblağ-ı bâkī-i mezbûr yüz yetmiş sekiz esedî guruş zimmetimde lâzımü’l-edâ ve vâcibü’l-kazâ deynim vardır deyü bi-tav‘ihâ ikrâr ve i‘tirâf etmeğin mûcebince meblağ-ı bâkī-i mezbûr yüz yetmiş sekiz esedî guruşu müdde‘î-i mezbûr Yusuf Bey’e edâ ve teslîme merkūme Fâtıma’ya tenbîh birle mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Saferü’l-hayr li-sene ihdâ ve tis‘în ve elf. Şuhûdü’l-hâl: İbrahim Çavuş el-Mübâşir, Hüseyin Efendi b. Himmet el-kâtib, Ali Çelebi el-Muhzır, Ahmed Çelebi b. Piyale, Mehmed Çelebi b. Haydar, Hüseyin Bey el-Attar, el-Hâc Hüseyin b. Abdullah.