Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 265 Hüküm no: 235 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Malının üçte biriyle adına hac yapılmasını vasiyet eden merhum Ebubekir b. Ramazan’ın bu vasiyetini yerine getirmek üzere ilgili meblağın Abdullah Efendi b. Dost Muhammed’e teslim edildiği Fi’l-asl nefs-i Semerkand ahâlîsinden olup hâlâ mahmiye-i İstanbul’da Ebulfeth ve’l-megāzî Sultân Mehmed Han Gāzi medârisinden birinde sâkin Abdullah Efendi b. Dost Muhammed meclis-i şer‘-i şerîf-i enverde mahmiye-i mezbûrede Dîvâne Ali Mahallesi sükkânından iken bundan akdem vefât eden el-Hâc Ebûbekir b. Ramazan’ın sülüs mâlını kabz ve vücûh-ı birre sarfa vasîyy-i muhtârı olan Ahmed Çelebi b. Mehmed mahzarında ikrâr-ı tâm ve takrîr-i kelâm edip mezbûr el-Hâc Ebûbekir bundan akdem maraz-ı mevtinde mâ-ba‘d-i mevtine izâfet ile cemî‘ mâlının sülüsü ifrâz ve sülüs-i mezkûrdan üç yüz esedî guruşu ile rûhu için edâ-i hâcc-ı şerîf ve ziyâret-i Ravza-i Seyyidü’l-mürselîn ettirilip mâ‘adâsı vücûh-ı birre harc ve sarf oluna deyü vasiyet ve bu vasiyetini tenfîze merkūm Ahmed Çelebi’yi vasîyy-i muhtâr nasb ve ta‘yîn edip ol dahi vesâyet-i mezbûreyi kabûl eyledikden sonra mezbûr el-Hâc Ebûbekir musırrân vefât edip cemî‘ mâlının sülüsünü mezbûr Ahmed Çelebi ahz ü kabz etmişidi el-hâletü hâzihî mezkûr Ahmed Çelebi müteveffâ-yı mezkûrun rûhu için edâ-i hâcc-ı şerîf ve ziyâret-i Ravza-i Seyyidü’l-mürselîn etmek için sülüs-i mezkûrdan meblağ-ı mezbûr üç yüz esedî guruşu işbu meclis-i şer‘de tamamen bana teslîm ben-dahi ber-vech-i meşrûh ahz ü kabz edip müteveffâ-yı mezbûrun vasiyeti üzre edâ-i hacca ta‘ahhüd eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-işrîn min-Saferü’l-hayr li-sene ihdâ ve tis‘în ve elf. Şuhûdü’l-hâl: Mustafa Efendi b. Mehmed, Ali Bey b. Mehmed, Mehmed Bey b. İsmail, Hüseyin Beşe b. Abdullah, Muslı Bey b. ( ).