Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 266 Hüküm no: 236 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saime bt. Abdullah’ın evini Osman adlı küçük çocuğun vasîsine istiğlal yoluyla sattığı Mahmiye-i İstanbul’da Sultân Selim Çarşısı kurbünde Koğacı Dede Mahallesi’nde sâkine Saime bt. Abdullah nâm hatun meclis-i şer‘-i hatîr-i lâzımü’t-tevkīrde mahalle-i mezbûrede sâkin iken bundan akdem vefât eden el-Hâc Muzaffer Ağa’nın sulbî sagīr oğlu Osman’ın tesviye-i emrine kıbel-i şer‘den mansûb vasîsi olan işbu bâ‘isü’l-kitâb Hasan Bey b. Mehmed nâm kimesne mahzarında bi-tav‘ihâ ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Kürkçü Hüseyin Beşe mülkü ve bir tarafdan imâma meşrût vakıf menzil ve bir tarafdan Sinan nâm kimesne vakfı olan menzil ve bir tarafdan tarîk-ı hâs ile mahdûd tahtânî iki bâb odayı ve bir sofayı ve bir kenîfi ve zât-ı eşcâr-ı müsmire ve gayr-ı müsmire bir mikdâr bahçeyi müştemil olan mülk menzilimi bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık tarafeynden îcâb ve kabûlü hâvî bi-tarîkı’l-istiğlâl yüz seksen esedî guruşa vasîyy-i mezbûra bey‘ ve teslîm ol dahi iştirâ ve tesellüm edip semeni olan meblağ-ı mezbûr yüz seksen esedî guruşu sagīr-i mezbûrun mâlından vasîyy-i mezbûr yedinden tamamen ahz ü kabz eylediğimden sonra menzil-i mezbûru vasîyy-i mezbûr Hasan Bey ba‘de’t-tahliyeti’ş-şer‘iye ve’t-takābuzı’l-mer‘î târih-i kitâbdan bir sene tamamına değin yirmi yedi esedî guruşa bana îcâr ve teslîm ben-dahi istîcâr ve tesellüm eylediğimden sonra meblağ-ı mezbûr yüz seksen esedî guruş ile ücret-i mezkûre yirmi yedi guruşu müddet-i mezbûre tamamında vasîyy-i mezbûra edâ ve teslîm edemez isem menzil-i mezbûru semen-i misli ile bey‘ ve kabz-ı semene ve semeninden deynim olan meblağayn-ı mezbûreyni vasîyy-i mezbûra edâ ve teslîme ve fazla kalırsa bana îsâl ve teslîme ve kabz [ve] îsâl mütevakkıf olduğu umûrun küllîsine küllemâ azeltüke fe-ente vekîlî mazmûnu üzre azl ve in‘izâlden masûne vekâlet-i devriye ile işbu hazır bi’l-meclis Hüseyin Efendi b. Mustafa’yı tarafımdan vekîl ve nâib-i menâb nasb ve ta‘yîn eylediğimde ol dahi kabûl ve merâsimini edâya ta‘ahhüd ve iltizâm eyledi dedikde gıbbe’t-tasdîkı’ş-şer‘î mukırra-i mezbûrenin zevci Hasan Beşe b. Mustafa dahi meclis-i şer‘de meblağ-ı mezbûr yüz seksen esedî guruşa ve ücret-i mezkûre yirmi yedi guruşa tarafeynden emir ve kabûlü hâviye kefâlet-i sahîha-i şer‘iye ile kefîl olmağın mâ-hüve’l-vâki‘ bi’t-taleb ketb olundu. Fî-gurreti Rebî‘i’l-evvel li-sene ihdâ ve tis‘în ve elf. Şuhûdü’l-hâl: Osman Efendi b. (...), Mehmed Efendi b. Şa‘ban, Mustafa Çelebi b. Mehmed, Şa‘ban Beşe b. Mehmed, İbrahim Çelebi b. ( ).