Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 267 Hüküm no: 238 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Dahkî Mustafa Efendi’nin, Hüma Hatun’un para vakfına olan borcunun terekesinden tahsil edilmesi Mahmiye-i İstanbul’da Emir Sinan Mahallesi’nde sâkin iken bundan akdem vefât eden merhûme Hümâ Hatun bt. Mustafa Bey nâm sahibetü’l-hayrın nemâsını mahmiye-i mezbûrede Ebulfeth ve’l-megāzî Sultân Mehmed Han Gāzi Câmi‘-i Şerîfi’nde eczâ-i şerîfe tilâvetine vakf eylediği nukūd-ı ma‘lûmeye hâlâ berat-ı şerîf ile mütevellî olduğu lede’ş-şer‘i’l-enver zâhir ve müte‘ayyin olan işbu râfi‘u’l-kitâb Şahin Beşe b. Abdullah Dîvân-ı Hümâyûn-ı sa‘âdet-makrûnda ma‘kūd meclis-i şer‘de mahmiye-i mezbûrede Şeyh Ebulvefâ Mahallesi’nde sâkin iken bundan akdem emr-i Bârî birle vedâ‘-ı âlem-i fânî eden Dahkî Mustafa Efendi b. Mirza’nın verâseti ammizâdeleri Hızır Beşe ve İlyas ibney Eyüb’e ve âhar ammizâdeleri el-Hâc İbrahim ve Hamza Beşe ibney Saruhan’a münhasıra olduğu şer‘an zâhir ve müte‘ayyin oldukdan sonra kendi tarafından asîl ve mezbûrân İlyas ve Hamza Beşe taraflarından zikri âtî husûsa vekîl olup yedlerinde olan vürûd-ı nakl hücceti nâtıka olduğu üzre Abdullah b. Ömer ve Sefer Beşe b. Mehmed şehâdetleri ile şer‘an vekâletleri sâbite olmağla merhûm-ı mezbûrun tereke-i vâfiyesine vâzı‘-ı yed olan mezbûrân Hamza Beşe ve el-Hâc İbrahim mahzarlarında bi’t-tevliye üzerlerine da‘vâ ve takrîr-i kelâm edip merhûm-ı mezbûr Dahkî Mustafa Efendi vakf-ı mezbûra nâzır olmağla benden mukaddem vakf-ı mezbûra mütevellî olan Hâver Çavuş’dan vakf-ı mezbûrun asl-ı mâlı olan dört bin esedî guruşu ahz ü kabz ve kendi mesârifine sarfla istihlâk edip meblağ-ı mezbûr vakf-ı mezbûra zimmetinde lâzımü’l-edâ ve vâcibü’l-kazâ deyni olduğunu alâ-ruûsi’l-işhâd hayatında ikrâr ve işhâd edip kable’l-edâ fevt olmağın suâl olunup tereke-i vâfiyesinden vakıf için alıverilmek matlûbumdur dedikde gıbbe’s-suâl mezbûrân Hızır Beşe ve el-Hâc İbrahim tereke-i vâfiye-i müteveffâ-yı mezbûra asâleten ve vekâleten vaz‘-ı yedlerini ikrâr lâkin deyn-i mezbûru bi’l-külliye inkâr edicek müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden olup mahmiye-i mezbûrede Derviş Ali Mahallesi’nde sâkin Hüseyin Efendi b. Hasan ve Şeyh Ebulvefâ kurbünde Dârü’l-hadîs Mahallesi’nde sâkin İmâm Abdullah Efendi b. Ahmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka merhûm-ı mezbûr Dahkî Mustafa Efendi bundan akdem hâl-i hayatında merhûme-i mezkûre [64a] Hümâ Hatun’un zikrolunan eczâ-i şerîfe tilâvetine nemâsını vakıf ve şart eylediği dört bin esedî guruşu mütevellî-i sâbık mezbûr Hâver Çavuş’dan ahz ü kabz ve kendi mesârifine sarfla istihlâk edip meblağ-ı mezbûr dört bin esedî guruş zimmetinde lâzımü’l-edâ ve vâcibü’l-kazâ deyni olduğunu bizim huzûrumuzda ikrâr ve bizi işhâd eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye etdiklerinde şâhidân-ı mezbûrânı ta‘dîl ve tezkiye için kıbel-i şer‘-i kavîmden irsâl olunan Mustafa Efendi b. Abdülaziz evvelâ mârrü’z-zikr Derviş Ali Mahallesi’ne varıp ahâlîsinden fahrü’l-müderrisîn Abdülkadir Efendi b. Mustafa ve Ahmed Efendi b. Mahmud ve Hasan Efendi b. Said ve Ahmed Çelebi b. Mustafa ve Seyyid Ali b. Mustafa ve Müezzin Mustafa Çelebi b. Mehmed ve Halil Çelebi b. Abdullah ve Mahmu[d] Efendi [b.] Musa ve Muslı b. Ali nâm kimesnelerden mezbûr Hüseyin Efendi’nin keyfiyet-i hâlini istikşâf etdikde mezbûr Hüseyin Efendi’nin adl ve makbûlü’ş-şehâde olduğunu her biri haber verdiklerinden sonra mârrü’z-zikr Dârü’l-hadîs Mahallesi’ne varıp ahâlîsinden müderrisi Mehmed Efendi b. Ahmed ve İbrahim Efendi b. Mehmed ve Ali Beşe b. Osman ve el-Hâc Musa Ağa b. Hüseyin ve el-Hâc İbrahim b. Mehmed ve İvaz Beşe b. Mustafa ve Hamza Bey b. Yusuf ve Fazlullah Dede b. Arslan ve Mustafa Çelebi b. İsmail nâm kimesnelerden mezbûr Abdullah Efendi’nin keyfiyet-i hâlini istihbâr etdikde mezbûr Abdullah Efendi’nin adl ve makbûlü’ş-şehâde olduğunu her biri haber vermeğin vâki‘ hâli mezbûr Mustafa Efendi mahâllinde terkīm edip ba‘dehû cânib-i şer‘den ma‘an irsâl olunan Mustafa Çelebi b. Hacı Dilaver ile meclis-i şer‘a gelip alâ-vukū‘ihî inhâ ve takrîr etmeğin emr-i ta‘dîl ve tezkiye tamâ[m] ve şehâdetleri makbûle olmağın mûcebiyle deyn-i mezbûr edâ olunmak üzre ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-Saferü’l-hayr li’s-seneti’l-mezbûre. Şuhûdü’l-hâl: Hüseyin Efendi b. Eyüb, Receb b. Ahmed, Hayyâtzâde Mehmed Efendi b. Hasan, Ahmed Çelebi b. Mehmed, Ahmed Efendi b. Ahmed, Mehmed Çelebi b. Haydar.