Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 269 Hüküm no: 239 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bâliğa ve reşîde olan Fâtıma bt. Mustafa’nın vasîsi Mehmed Çelebi’deki parasını teslim aldığı Dârü’l-hilâfeti’l-aliyye Kostantıniyye el-mahmiye’de Mesih Paşa Câmi‘-i Şerîfi kurbünde Hasan Paşa Mahallesi’nde sâkine olup sinn ve cüssesinin bulûğa tahammülü olmağla bulûğunu mu‘terife ve on dört yaşını tekmîl edip bâliğa ve reşîde ve umûrunu bi-zâtihâ ikāmete kādire olmağın vasîden müstağniye olduğu zâtını ma‘rifet-i şer‘iye ile ârifûn Hasan Çelebi b. Mustafa ve Müezzin İbrahim Çelebi b. Mehmed ve Müezzin Mehmed Halîfe b. Rıdvan ve İbrahim Efendi b. Sefer ve Hamza b. Hasan ve sâir zeyl-i kitâbda muharrerü’l-esâmî Müslimîn ihbârlarıyla zâhir ve müte‘ayyin olan Fâtıma bt. el-Hâc Mustafa meclis-i şer‘-i şerîf-i enverde mahmiye-i mezbûrede Dülgerzâde Mahallesi’nde sâkin Mehmed Çelebi b. Muslı Çelebi nâm kimesne mahzarında üzerine da‘vâ ve takrîr-i kelâm edip babam mezbûr el-Hâc Mustafa vefât eyledikde ben sagīre bulunup tesviye-i umûruma mezbûr Mehmed Çelebi vasîyy-i muhtâr olmağla müteveffâ-yı mezbûrun terekesinden ber-mûceb-i defter-i kassâm-ı askerî bana isâbet eden beş bin seksen yedi esedî guruşumu bi’l-vesâye kabz ve tesellüm etmişidi ben ber-vech-i meşrûh bâliğa ve reşîde ve umûrumu vasî görmekden müstağniye olmağın suâl olunup takrîri tahrîr ve meblağ-ı mezbûru bana teslîme mezbûr Mehmed Çelebi’ye tenbîh olunmak matlûbumdur dedikde gıbbe’s-suâl mezbûr Mehmed Çelebi cevâbında fi’l-hakīka bâlâda ketb ü terkīm olunan minvâl üzre mezbûr el-Hâc Mustafa vefât etdikde kızı merkūme Fâtıma sagīre bulunup kendi tesviye-i umûru için vasîyy-i muhtâr olmağla tereke-i müteveffâ-yı mezbûrdan mezbûre Fâtıma’ya müntakil ber-mûceb-i defter-i kassâm-ı askerî beş bin seksen yedi esedî guruşu bi’l-vesâye kabz ve tesellüm edip hâlâ meblağ-ı mezbûr yedinde mevcûd idüğünü tav‘an ikrâr ve mezkûrenin sinn ve bulûğ ve rüşdünü tasdîk etmeğin mûcebiyle meblağ-ı mezbûru mezkûre Fâtıma’ya teslîme merkūm Mehmed Çelebi’ye ba‘de’t-tenbîh mezbûre Fâtıma meclis-i şer‘de merkūm Mehmed Çelebi mahzarında bi-tav‘ihâ ikrâr-ı tâm ve takrîr-i kelâm edip merkūm Mehmed Çelebi’nin bi’l-vesâye ber-vech-i muharrer makbûzu olan meblağ-ı mezbûr beş bin seksen yedi esedî guruşu bana def‘ ü teslîm ben-dahi bi’t-tamam ahz ü kabz ve tesellüm edip meblağ-ı mezbûrdan mezkûr Mehmed Çelebi yedinde ve zimmetinde bir akçe ve bir habbe kalmayıp babam müteveffâ-yı mezbûrun terekesine müte‘allika da‘vâdan mezbûr Mehmed Çelebi’yi ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î [64b] mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Saferü’l-hayr li-sene ihdâ ve tis‘în ve elf. Şuhûdü’l-hâl: Hasan Çelebi b. Mustafa, el-Hâc Veli b. Nasuh, es-Seyyid Cemaleddin b. Ahmed, Mehmed b. Şa‘ban, Ahmed Çelebi b. Sefer, İbrahim Çelebi b. Mehmed el-müezzin, İsmail Efendi b. Mehmed, Ali Efendi b. el-imâm, Memiş Halîfe b. Rıdvan, Hamza Efendi b. ( ).