Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 272 Hüküm no: 242 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Rum Ali Ağa b. Abdullah’ın varislerinin Ahmed Ağa’ya açtıkları, merhûmun sattığı cariye ile ilgili alacak davasının reddedildiği Mahmiye-i İstanbul’da Bostancıbaşı Mahallesi’nde sâkin iken bundan akdem vefât eden Rum Ali Ağa b. Abdullah’ın verâseti zevce-i metrûkesi Ümmühani bt. Ali’ye ve li-ebeveyn kız karındaşı oğlu Süleyman b. Abdullah’a münhasıra olduğu şer‘an zâhir ve sâbit oldukdan sonra mezbûre Ümmühani tarafından husûs-ı âti’l-beyâna vekîl olduğu nehc-i şer‘î üzre sâbit olan Ahmed b. Mustafa nâm kimesne vekâleten ve mezbûr Süleyman asâleten meclis-i şer‘-i hatîr-i lâzımü’t-tevkīrde işbu bâ‘isü’l-kitâb es-Seyyid Ahmed Ağa b. es-Seyyid Salih nâm kimesne mahzarında her biri üzerine da‘vâ ve takrîr-i kelâm edip mûrisimiz müteveffâ-yı mezbûr Ali Ağa bundan akdem asker-i İslâm Kamaniçe kal‘ası seferinde iken orta boylu sarı açık kaşlı elâ gözlü Rusiyyetü’l-asl Beyzât bt. Abdullah nâm câriyesini hayatında yüz seksen esedî guruşa mezbûr es-Seyyid Ahmed Ağa’ya bey‘ ve teslîm ol dahi iştirâ ve tesellüm eyledikden sonra semeni olan meblağ-ı mezbûr yüz seksen esedî guruşu kable’l-ahz ve’l-istifâ vefât edip meblağ-ı mezbûr merkūm es-Seyyid Ahmed Ağa zimmetinde kalmağın hâlâ suâl olunup meblağ-ı mezbûru bize edâ ve teslîme mezbûr es-Seyyid Ahmed Ağa’ya tenbîh olunmak matlûbumuzdur dediklerinde gıbbe’s-suâl mezbûr es-Seyyid Ahmed Ağa cevâbında merkūka-i mezbûreyi müteveffâ-yı mezbûr Ali Ağa hayatında kal‘a-i mezbûre altında bana doksan guruşa bey‘ ve teslîm ben-dahi iştirâ ve tesellüm edip semeni olan meblağ-ı mezbûr doksan guruşu kal‘a-i mezbûre altında müteveffâ-yı mezbûr Ali Ağa’ya hayatında def‘ ve teslîm ol dahi ahz ü kabz eylemişdir deyü [de]f‘le mukābele edip ziyâdeyi inkâr edicek evvelâ mezbûr es-Seyyid Ahmed Ağa’dan def‘-i mezbûruna beyyine taleb olundukda udûl-i Müslimînden olup mahmiye-i mezbûrede Sultân Ahmed İmâreti’nde sâkin Hasan Bey b. Üveys ve Akbıyık Mahallesi’nde sâkin İsmail Bey b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Ali Ağa hayatında kal‘a-i mezbûre altında mevsûfe-i mezbûre Beyzât’ı doksan esedî guruşa mezbûr es-Seyyid Ahmed Ağa’ya bey‘ ve teslîm ol dahi iştirâ ve tesellüm edip semeni olan meblağ-ı merkūm doksan esedî guruşu bizim huzûrumuzda mezbûr es-Seyyid Ahmed Ağa müteveffâ-yı mezbûr Ali Ağa’ya hayatında tamamen def‘ ü teslîm ol dahi ahz u kabz eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra müdde‘iyyân-ı mezbûrândan dahi ziyâdeye beyyine taleb olundukda ityân-ı beyyineden [65b] izhâr-ı acz edip mezbûr Ahmed Ağa’ya yemîn dahi vermemekle müdde‘iyyân-ı mezbûrân bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-hâmis ve’l-işrîn min-Saferü’l-hayr li-sene ihdâ ve tis‘în ve elf. Şuhûdü’l-hâl: el-Hâc Ahmed b. ( ), Mehmed Çelebi b. ( ), Ahmed Çelebi b. Piyale, Mehmed Çelebi b. Haydar.