Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 277 Hüküm no: 245 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Dimitri’nin sahip olduğu su değirmenini Yani v. Dimitri’ye sattığı Vilâyet-i Rumeli’nde Yenişehir kazâsı nevâhîsinden Kûhistân nâhiyesine tâbi‘ Kirasova nâm karyeden olup mahmiye-i İstanbul’da müsâfiren sâkin Yorgi v. Dimitri nâm zimmî meclis-i şer‘-i hatîr-i lâzımü’t-tevkīrde bâ‘isü hâze’s-sifr Yani v. Dimitri nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip akd-i âti’z-zikrin sudûruna değin yedimde mülküm olup karye-i mezbûrede vâki‘ bir tarafdan Selviova Değirmeni ve bir tarafdan cebel ve bir tarafdan [tarîk-ı] âm ile mahdûd bir göz mülk su değirmenimi bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık tarafeynden îcâb ve kabûlü hâvî bey‘-ı kat‘î ile mezbûr Yani’[ye] beş bin beş yüz kırk akçeye bey‘ ve temlîk merkūm Yani dahi iştirâ ve temellük ve kabûl edip semeni olan meblağ-ı mezbûr beş bin beş yüz kırk akçeyi merkūm Yani yedinden bi’t-tamam ahz ü kabz edip mârrü’z-zikr değirmeni mahâllinde zabt ve tasarrufa merkūm Yani’yi taslît eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâlis min-Rebî‘i’l-evvel li-sene ihdâ ve tis‘în ve elf. Şuhûdü’l-hâl: Mehmed Çelebi b. Haydar, Ahmed Çelebi b. Piyale, Mehmed Çelebi b. Cafer, Ahmed Çelebi b. ( ), Todori v. Lalo, Yorgi v. Yakodimi.