Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 278 Hüküm no: 246 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük yaşta vefat eden Mustafa Çelebi’nin varislerinin, Mustafa Çelebi’nin nakit ve eşyalarıyla ilgili vasîsi Safiye Hatun’a açtıkları davanın reddedildiği Mahmiye-i İstanbul’da Tercüman Yunus Mahallesi’nde sâkin iken bundan akdem vefât eden İsa Çelebi b. Mehmed Efendi’nin verâseti vâlidesi Fâtıma Hatun bt. Mustafa Efendi ile sulbî sagīr oğlu Mustafa Çelebi’ye münhasıra olup ba‘dehû mezbûr Mustafa Çelebi dahi vefât edip verâseti vâlidesi Nazükî bt. Abdullah nâm hatun ile li-üm er karındaşı Hüseyin nâm sagīre münhasır[a] olduğu şer‘an zâhir ve müte‘ayyin oldukdan sonra mezbûre Nazükî Hatun’un zevci ve tarafından husûs-ı âti’z-zikri taleb ve da‘vâ ve ahz ü kabza vekîl olup mezbûrenin zâtını ma‘rifet-i şer‘iye ile ârifân olan mahmiye-i mezbûrede Mehmed Ağa Câmi‘-i Şerîfi kurbünde sâkin Mustafa Çelebi b. İbrahim ve Abdi Çelebi b. Süleyman şehâdetleriyle şer‘an vekâleti sâbite olan sagīr-i mezbûr Hüseyin’in babası ve velîsi el-Hâc Mehmed b. Abdullah meclis-i şer‘-i şerîf-i enverde müteveffâ-yı mezbûr Mustafa Çelebi’nin hâl-i hayatında tesviye-i umûru için kıbel-i şer‘-i enverden mansûbe vasîsi olan râfi‘atü hâze’l-kitâb Safiye Hatun bt. Mustafa Efendi tarafından husûs-ı âti’z-zikre vekîl olup zât-ı mezbûreyi ma‘rifet-i şer‘iye ile ârifân olan mahalle-i mezbûre sükkânından Mehmed Çelebi b. Hasan ve Ahmed Bey b. Mustafa şehâdetleri ile şer‘an vekâleti sâbite olan Süleyman Efendi b. Hasan mahzarında vekâleten ve velâyeten üzerine da‘vâ ve takrîr-i kelâm edip müvekkile-i mezbûre Safiye Hatun bundan akdem sagīr-i mezbûr Mustafa Çelebi’nin hâl-i hayatında tesviye-i umûru için savb-ı şer‘-i enverden mansûbe vasîsi olmağla sagīr-i mezbûr Mustafa Çelebi’ye babası müteveffâ-yı mezbûr İsa Çelebi’den bi’l-irsi’ş-şer‘î isâbet ve intikāl eden mâlından ber-mûceb-i defter-i kassâm bin altmış esedî guruş ve hâric-i ez-defter-i kassâm nakid altı yüz esedî guruş ve üç yüz kırk iki altın ve üç kumaş yorgan ve üç yemenî yorgan ve bir döşek ve bir güğüm ve bir sarı velence ve altı kadife yasdık ve bir ocak perdesi ve iki yüz vukıyye sabun ve yüz vukıyye sakız ve yüz elli vukıyye şem‘-i aselini kendünün câriye-i memlûkesi Gonca bt. Abdullah yediyle bi’l-vesâye ahz ü kabz eyledikden sonra sagīr-i mezbûr Mustafa Çelebi vefât etmekle zikrolunan meblağlar ile eşyâ-i mezkûre karındaşı mezbûr Hüseyin ile vâlidesi müvekkile-i mezbûre Nazükî Hatun’a isâbet eyledikden sonra müvekkile-i mezbûre Safiye Hatun bi’l-vesâye makbûzu olan meblağlar ile eşyâ-i mezkûreden ancak meblağ-ı mezbûr bin altmış esedî guruşu bi’d-defa‘ât bana edâ ve teslîm ben-dahi vekâlet ve velâyetim hasebiyle ahz ü kabz edip mâ‘adâyı dahi taleb eylediğimde bana teslîmden imtinâ‘ eder suâl olunup hâric-i ez-defter olan meblağayn-ı mezkûreyn altı yüz esedî guruş ve üç yüz kırk iki altını ve eşyâ-i mezkûrenin a‘yânı mevcûde ise a‘yânını değil ise ba‘de’s-sübût kıymet-i şer‘iyelerini müvekkile-i mezbûre bana teslîme vekîl-i mezbûra tenbîh olunmak matlûbumdur dedikde gıbbe’s-suâl [67a] vekîl-i mezbûr Süleyman Efendi cevâbında müvekkile-i mezbûre Safiye Hatun müdde‘î-i mezbûrun kabzını i‘tirâf eylediği ancak meblağ-ı mezbûr bin altmış esedî guruşu bi’l-vesâye ahz ü kabz etmişidi deyü ziyâde kabzını bi’l-külliye inkâr edicek müdde‘î-i mezbûr el-Hâc Mehmed’den müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin müvekkile-i mezbûre Safiye Hatun alîle ve sahibetü’l-firâş olup meclis-i şer‘a huzûru müte‘azzir olmağla mahâllinde tahlîf için savb-ı şer‘den Mevlânâ Ebûbekir Efendi b. Abdülkerim irsâl olunup ol dahi zikrolunan Tercüman Yunus Mahallesi’nde mezbûr Safiye Hatun’un menziline varıp mezbûre Safiye Hatun zâtını ma‘rifet-i şer‘iye ile ârifân olan mahalle-i mezbûre sükkânından Mehmed Ağa b. Salih ve Ahmed Bey b. Mustafa ta‘rîfleriyle mu‘arrefe oldukdan sonra meblağ-ı mezbûr bin altmış guruşdan mâ‘adâ hâric-i ez-defter müteveffâ-yı mezbûr İsa Çelebi’den sagīr-i mezbûr Mustafa Çelebi’ye bi’l-irsi’ş-şer‘î isâbet eden mâlından nakid altı yüz guruş ve üç yüz kırk iki altın ve üç kumaş yorgan ve üç yemenî yorgan ve bir döşek ve iki yemenî mak‘ad ve bir Selanik orta keçesi ve dört minder ve bir kebîr leğen ve bir mangal ve bir havan ve iki bakraç ve bir güğüm ve sarı velence ve altı kadife yasdık ve bir ocak perdesi ve iki yüz vukıyye sabun ve yüz vukıyye sakız ve yüz elli vukıyye şem‘-i aselini sagīr-i mezbûr Mustafa Çelebi için câriye-i memlûkesi Gonca bt. Abdullah yediyle bi’l-vesâye ahz ü kabz etmeyip ol vechile meblağayn-ı mezkûreyn ile eşyâ-i mezkûrenin a‘yânı mevcûde ise a‘yânını değil ise ba‘de’s-sübût kıymet-i şer‘iyelerini sagīr-i mezbûr Hüseyin ile müvekkile-i mezbûre Nazükî’ye edâ ve teslîm üzerine lâzım gelmediğine zeyl-i kitâbda muharrerü’l-esâmî olan Müslimîn huzûrlarında mezbûre Safiye Hatun’a yemîn teklîf eylediğinde ol dahi hasbe’l-mesûl yemîn billâhi’l-aliyyü’l-a‘lâ etmeğin vâki‘ hâli merkūm Ebûbekir Efendi mahâllinde ketb ü tahrîr edip ba‘dehû ma‘an irsâl olunan Mehmed Çelebi b. Haydar ile meclis-i şer‘a gelip alâ-vukū‘ihî inhâ ve takrîr etmeğin mûcebiyle müdde‘î-i mezbûr el-Hâc Mehmed bilâ-beyyine bî-vech mu‘ârazadan men‘ olunup mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-işrîn min-Saferü’l-hayr li-sene ihdâ ve tis‘în ve elf. Şuhûdü’l-hâl: Mehmed Çelebi b. Haydar, Mehmed Ağa b. Salih, Ahmed Bey b. Mustafa, Ahmed Çelebi b. Piyale.