Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 279 Hüküm no: 247 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Mehmed’in evini karısı Hayrunnisa bt. Mustafa’ya sattığı Mahrûse-i Galata muzâfâtından kasaba-i Kasımpaşa’da Sahhâf Muhyiddin Mahallesi’nde sâkin el-Hâc Ahmed Ağa b. el-Hâc Mehmed nâm kimesne meclis-i şer‘-i hatîr-i lâzımü’t-tevkīrde <> işbu bâ‘isetü’l-kitâb kendi zevcesi Hayrunnisa bt. Mustafa nâm hatunun tarafından husûs-ı âti’l-beyâna vekîl olup zâtını ma‘rifet-i şer‘iye ile ârifûn olan Şa‘ban Efendi el-Hatîb ve Mustafa Bey b. Muslı ve Mustafa Çelebi b. Ahmed şehâdetleriyle şer‘an vekâleti sâbite olan İmâm Mustafa Efendi b. Abdülcabbar mahzarında ikrâr ve i‘tirâf edip mahalle-i mezbûrede vâki‘ bir tarafdan kendi mülküm ve bir tarafdan ba‘zan Ali Çelebi mülkü ve ba‘zan Kalaycı Himmet mülkü ve bir tarafdan Hasan Kapudan veresesi yedinde olan bostan ve bir tarafdan tarîk-ı âm ile mahdûd dâhiliyesinde iki bâb tahtânî oda ve iki matbah ve bir su kuyusu ve fevkānî ve tahtânî iki kenîf ve hâriciyesinde iki bâb fevkānî oda ve tahtında ahırı ve bir bâb huddâm odası ve iki kenîf ve bir musluk ve bir mikdâr bahçeyi müştemil olan mülk menzilimi cümle tevâbi‘ ve levâhıkıyla zevcem müvekkile-i mezbûre Hayrunnisa Hatun’a sekiz yüz kıt‘a guruşa tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzre iştirâ ve tesellüm eyledikden sonra semen-i mezkûr sekiz yüz kıt‘a guruşu bi’t-tamam ve’l-kemâl zevcem müvekkile-i mezbûre Hayrunnisa Hatun yedinden tamamen ahz ü kabz eyledim ba‘de’l-yevm menzil-i mezbûr mezbûre Hayrunnisa (sahh) Hatun’un mülk-i müşterâsıdır keyfe mâ teşâ’ ve tahtâr mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min- Rebî‘i’l-evvel li-sene ihdâ ve tis‘în ve elf. Şuhûdü’l-hâl: Abdurrahman b. Mustafa el-müezzin, Mustafa Ağa b. ( ), Mustafa Çelebi Dedeoğlu, Mustafa Ağa Hamamcıbaşı, Kapıcı Mustafa Ağa, Receb b. Mustafa, Hasan b. Abdullah, İbrahim b. Abdullah.