Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 280 Hüküm no: 248 Orijinal metin no: [67a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Maksud’un Yahudi Kalef v. Sakanya ile kardeşi Mosi’yi alacağı kalmadığını beyan ile ibra ettiği Mahrûse-i Galata muzâfâtından kasaba-i Tophâne’de Çavuşbaşı Mahallesi sükkânından olup sâbıkā Harmuş Mehmed Paşa kethudâsı olan Mustafa Ağa b. Maksud meclis-i şer‘-i hatîr-i lâzımü’t-tevkīrde mahmiye-i İstanbul’da Cibali Kapısı hâricinde sâkin işbu bâ‘isü’l-vesîka Kalef v. Sakanya nâm Yahûdî muvâcehesinde bi’t-tav‘i’s-sâf ikrâr-ı tâm ve takrîr-i kelâm edip paşa-yı müşârün-ileyh bin seksen senesinde Hama Sancağı’nda mutasarrıf iken bana îsâl ve teslîm için gāib ani’l-meclis Teltemis? el-Hâc Mehmed Ağa’ya on bin kıt‘a esedî guruş teslîm ol dahi ba‘de’l-kabz [ben] medîne-i Yenişehir’de olup hazır bulunmamağla sâbıkā reisülküttâb kāimmakāmı olan Mustafa Efendi’nin ev kethudâsı el-Hâc Mehmed Ağa ile ma‘an meblağ-ı mezbûru (...) [bi-tarîkı’l-]vedî‘a mezbûr Mustafa Efendi’nin [67b] mahmiye-i mezbûrede Alay Köşkü kurbünde vâki‘ menzilinde bana îsâl için mezbûr Kalif’e [Kalef’e] teslîm ol dahi ber-vech-i muharrer ahz ü kabz edip ve yine bin yetmiş dokuz senesinde merkūm Mustafa Efendi’nin menzilinde her kîsesi beşer yüz kıt‘a esedî guruş olmak üzre otuz yedi kîse olmak üzre on sekiz bin beş yüz kıt‘a esedî guruşumu dahi mezbûr Kalef’e îdâ‘ ve teslîm ol dahi istid‘â ve kabz ve tesellüm edip ve yine târih-i kitâbdan dokuz sene mukaddem ellişer bin akçe kıymetli bir[i] yeşil ve biri sünbülî çukaya kaplı iki sırt samur kürk ve otuz bin akçe kıymetli iki zırh ve beşer guruş kıymetli elli buruc alacası ve kırk beşer guruş kıymetli on üç Lekepûri bogāsı ve birer buçuk guruş kıymetli yetmiş sekiz Acem donluğu bogāsı ve kırk beşer guruş kıymetli levn ve cins ve zirâ‘ı beynimizde ma‘lûm on iki küce Acem çiti ve beşer guruş kıymetli beş Şam alacası âhara bey‘ ve semenlerini bana teslîm için mezbûr Kalef’e teslîm ol dahi ahz ü kabz ve tesellüm ve âhara bey‘ etmişidi deyü zikrolunan husûsları mezbûr Kalef’den bi’d-defa‘ât da‘vâ edip beynimizde münâza‘ât-ı kesîre ve muhâsamât-ı şedîde cereyân etmişidi lâkin evvelâ tahrîr olunan on bin kıt‘a esedî guruşu bin seksen bir senesinde mahrûse-i Edirne’de bi’t-tamam ahz ü kabz ve târih-i mezkûrda Rumeli Kādıaskeri olan fazîletlü Şeyh Mehmed İzzetî Efendi huzûrunda ikrâr dahi edip ve sâniyen tahrîr olunan on sekiz bin beş yüz esedî guruşun dahi bir def‘a bin esedî guruşunu bir def‘a mahmiye-i mezbûrede ve on yedi bin beş yüz guruşunu dahi târih-i mezkûrda mahrûse-i Selanik’de ordu-yı hümâyûnda mezbûr Kalef yedinden tamamen alıp kabz edip paşa-yı müşârün-ileyhin cânib-i mîrîye olan deyni için taraf-ı mîrîye verip ve eşyâ-i mastûrenin dahi semenleri olan cem‘an iki bin dokuz yüz otuz yedi guruşu dahi merkūm Kalef yedinden bi’t-tamam ve’l-kemâl ahz ü kabz ve tesellüm edip mezbûr Kalef yedine müte‘addid hüccet-i şer‘iye dahi verilmişdir işbu hüccetde münderic olan ahz ü i‘tâdan mâ‘adâ mezbûr Kalef ve karındaşı Mosi ile bi-vechin mine’l-vücûh beynimizde ahz ve i‘tâ cereyân etmeyip zikrolunan meblağlar[d]an dahi bir akçe ve bir habbem kalmayıp husûs-ı mezkûreye ve sâire müte‘allika âmme-i de‘âvî ve muhâsamât ve eymân ve mutâlebâtdan mezbûrân Kalef ve Mosi’yi ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-işrîn min-Saferü’l-hayr li-sene ihdâ ve tis‘în ve elf. Şuhûdü’l-hâl: Mehmed Bey b. Abdullah, Ebûbekir Efendi b. Abdülkerim, Mustafa Efendi b. Hasan, Mehmed Çelebi b. Haydar, Çukadar Hasan Beşe b. ( ), İbrahim Çelebi b. Mehmed.