Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 281 Hüküm no: 249 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi b. Ahmed’in vefat eden Ümmühani bt. Mehmed’in varisi olduğunu ispatlaması Mahmiye-i İstanbul’da beytü’l-mâl-i hâssa emîni olan fahrü’l-akrân Ömer Ağa b. Osman tarafından husûs-ı âti’l-beyâna vekîl olduğu nehc-i şer‘î ve tarîk-ı mer‘î üzre sâbit olan Mehmed Çelebi b. Mustafa nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb İbrahim Çelebi b. Ahmed nâm kimesne mahzarında bi’l-vekâle üzerine da‘vâ ve takrîr-i kelâm edip mahmiye-i mezbûrede Tercüman Yunus Mahallesi’nde sâkin iken bundan akdem vefât eden Ümmühani bt. Mehmed nâm hatunun zâhirde vâris-i ma‘rûfu olmayıp terekesi beytü’l-mâle âid olmağla müteveffât-ı mezbûrenin terekesinden bir zenne ferâcesiyle bir sîm küçük ön kuşağını mezbûr İbrahim ahz ü kabz edip bi-gayr-ı vechin şer‘î vaz‘-ı yed etmekle hâlâ suâl olunup mârrü’z-zikr ferâce ile kuşağı beytü’l-mâl için bana teslîme mezbûr İbrahim’e tenbîh olunmak matlûbumdur dedikde gıbbe’s-suâl mezbûr İbrahim cevâbında zikrolunan ferâce ile kuşağa vaz‘-ı yedini ikrâr lâkin ben müteveffât-ı mezbûrenin babası mezbûr Mehmed’in li-ebeveyn er karındaşı Ahmed’in oğlu olup ve hasren vârisi olmağla hatta huzûr-ı Müslimînde ber-vech-i muharrer babasının li-ebeveyn karındaşı Ahmed’in oğlu olup ve hasren vârisi olduğumu hayatında ikrâr ve ben-dahi tasdîk edip mukırratün-aleyhâ vefât etmekle mukırrûn-leh bi’n-neseb cihetinden ben müteveffât-ı mezbûrenin hasren vârisiyim deyü def‘le mukābele edicek gıbbe’l-istintâk ve’l-inkâr mezbûr İbrahim’den ber-vech-i muharrer verâsetine beyyine taleb olundukda udûl-i Müslimînden Yazıcı Mahallesi imâmı olan el-Hâc Hüseyin Efendi b. Abdullah ve mahalle-i mezbûre sükkânından es-Seyyid Ali Efendi b. Abdullah ve Hasan Efendi b. Ahmed ve el-Hâc Cafer b. Abdurrahman nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-hakīka müteveffât-ı mezbûre Ümmühani Hatun hayatında bizim huzûrumuzda mezbûr İbrahim için babası mezbûr Mehmed’in li-ebeveyn karındaşım [karındaşı] Ahmed’in oğludur ve hasren vârisimdir deyü ikrâr mezbûr İbrahim dahi tasdîk edip mukırratün-aleyhâ vefât etmekle mezbûr İbrahim müteveffât-ı mezbûrenin mukırrûn-leh bi’n-neseb cihetinden hasren vârisidir biz bu husûsa bu vech üzre şâhidleriz şehâdet [68a] dahi ederiz deyü her birleri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince mezbûr İbrahim’in ber-vech-i muharrer verâsetine ba‘de’l-hükm vekîl-i mezbûru bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-hâmis [min]-Rebî‘i’l-evvel li-sene ihdâ ve tis‘în ve elf. Şuhûdü’l-hâl: Hasan Efendi b. Abdullah, Mustafa Çelebi b. İbrahim, Ali Çelebi b. Mustafa, Hasan Efendi b. el-kâtib, Mehmed Çelebi b. Haydar, Ahmed Çelebi b. Piyale.