Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 282 Hüküm no: 250 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şemsi Hatun bt. Abdullah’ın evini Mustafa Efendi b. Mehmed’e sattığı Mahmiye-i İstanbul’da Sultân Selim Çarşısında vâki‘ Koğacı Dede Mahallesi’nde sâkine zâtını ma‘rifet-i şer‘iye ile ârifân el-Hâc Bilal b. Abdullah ve Kayyım Himmet Dede b. Mustafa nâm kimesneler ma‘rifetiyle mu‘arrefe olan Şemsi Hatun bt. Abdullah meclis-i şer‘-i hatîr-i lâzımü’t-tevkīrde işbu bâ‘isü’l-kitâb Mustafa Efendi b. Mehmed nâm kimesne mahzarında bi-tav‘ihâ ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrede vâki‘ bir tarafdan Kadri Çelebi mülkü ve bir tarafdan Hasan Paşa veresesi mülkü ve bir tarafdan Osman Paşa vakfı olan odalar ve bir tarafdan tarîk-ı hâs ile mahdûd olup fevkānî bir bâb oda ve tahtânî iki bâb odayı ve bir köhne matbahı ve bir su kuyusunu ve kenîfi ve bir dut ağaçlı bir mikdâr havliyi müştemil olan mülk menzilimi bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık taraf[ey]nden îcâb ve kabûlü hâvî bey‘-ı kat‘î ile iki yüz esedî guruş ile min-haysü’l-işâre ma‘lûme ve min-haysü’l-kemmiye mechûle bir kabza fülûs-ı muzayya‘aya bey‘ ve teslîm ol dahi iştirâ ve tesellüm eylediğinden sonra semeni olan meblağ-ı mezbûr iki yüz esedî guruşu mezbûr Mustafa Efendi yedinden tamamen ahz ü kabz eyledim ba‘de’l-yevm menzil-i mahdûd-ı mezbûrda benim kat‘a alâka ve medhalim kalmayıp mezbûr Mustafa Efendi’nin mülk-i müşterâsı ve hakk-ı sırfı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahr[îren] fi’l-yevmi’s-sâmin min-Rebî‘i’l-evvel li-sene ihdâ ve tis‘în ve elf. Şuhûdü’l-hâl: İmâm Ali Efendi, Müezzin Mehmed Çelebi, Abdülbaki Ağa b. Mustafa, Kadri Çelebi b. Abdülbaki, el-Hâc Hasan b. Mustafa, Kürkçü İbrahim Beşe, Veli Beşe, Mehmed b. Receb, Hacı Mahmud, Mustafa b. Mahmud, Doğramacı el-Hâc Ahmed, Kömürcü Hasan Beşe.