Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 283 Hüküm no: 251 Orijinal metin no: [68a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Dilco’nun parasını çaldıkları iddiasıyla İsayi v. Asvador ile iki arkadaşına açtığı davanın reddedildiği Mahmiye-i İstanbul hısnı ebvâbından Edirnekapısı dâhilinde Hacı Muhyiddin Mahallesi’nde sâkin işbu Yani v. Dilco nâm zimmî meclis-i şer‘-i hatîr-i lâzımü’t-tevkīrde işbu bâ‘isü’s-sifr İsayi v. Asvador ve Bedros v. Sergiz ve Aslan v. Kirkor nâm zimmîler muvâcehelerinde üzerlerine da‘vâ ve takrîr-i kelâm edip işbu târih-i kitâb senesi şehr-i Rebî‘ülevvel’inde vâki‘ Vilâyet-i Rumeli’nde Bergos kasabası panayırından mahmiye-i İstanbul’a gelir iken mezbûrûn ile refîk olup târih-i kitâbdan üç gün mukaddem esnâ-i tarîkda hânda gece ile garârım açıp bir darçınî kîse içinde olan iki yüz otuz esedî guruşumu ahz ü kabz etmeleri ile hâlâ mezbûrûna suâl olunup meblağ-ı mezbûrun alıverilmesi maltûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin ber-vech-i muharrer müdde‘î-i mezbûr ile zikrolunan panayırdan İstanbul’a gelirken esnâ-i tarîkda hânda gece ile müdde‘î-i mezbûrun garârın açıp içinden darçınî kîse ile iki yüz otuz guruşunu hufyeten ahz ü kabz etmeyip müdde‘î-i mezbûrun bir vech ile üzerlerinde hakkı olmadığına mezbûrûn İsayi ve Bedros ve Aslan’dan her birine yemîn tekâlîf olundukda onlar dahi her biri dahi yemîn [alâ]-vefkı’l-mesûl yemîn billâhi’llezî enzele’l-İncîle alâ-İsa aleyhi’s-selâm etmeğin mûcebince müdde‘î-i mezbûra bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’r-râbi‘ [min]-Rebî‘i’l-evvel li-sene ihdâ ve tis‘în ve elf. Şuhûdü’l-hâl: Nebî Çelebi b. Haydar, Hasan Beşe b. Osman, Ahmed Çelebi b. Piyale, Ahmed Çelebi b. Piyale, Ahmed Çelebi b. Haydar.