Bab Mahkemesi 54 Numaralı Sicil (H. 1102 / M. 1691) cilt: 20, sayfa: 332 Hüküm no: 399 Orijinal metin no: [69a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Veli’nin, annesi Hacı Timurhan bt. Abdullah’tan talep ettiği eşya davasında sulh olduğu Husûs-ı âti’l-beyânın mahallinde ketb ve tahrîri için bi’l-iltimâs savb-ı şer‘-i âlîden irsâl olunan mevlânâ Ali Efendi b. Sunullah mahmiye-i İstanbul’da Şehzâde Sultan Mehmed Hân Câmi‘-i şerîfi kurbunda Emin Nureddin mahallesinde sâkine Hâce Timurhan bt. Abdullah nâm hâtunun sâkine olduğu menzile varıp, zeyl-i kitâbda muharrerü’l-esâmi müslimîn huzûrlarında akd-i meclis-i şer‘-i şerîf eyledikde, mezbûre Timurhan’ın kızı Emine bt. Veli nâm hâtunun zevci ve tarafından husûs-ı âti’l-beyâna vekîl olduğu zâtını ârifân Mehmed Çelebi b. Veli ve Ahmed Çelebi b. Mustafa şehâdetleriyle şer‘an sâbit olan Ali Çelebi b. Mustafa Efendi meclis-i ma‘kūd-ı mezbûrda, işbu bâ‘isetü’l-kitâb mezbûre Timurhan mahzarında bi’l-vekâle ikrâr ve takrîr-i kelâm edip, müvekkilem mezbûre Emine’ye vâlidesi merkūma cihâz olmak üzre üzre verdiği eşyâsından dört cedîd yasdık ve iki köhne yasdık ve iki köhne çuka yasdık ve dört minder ve üç yan keçesi ve bir orta keçesi ve bir mâî kaliçe ve bir seccâde ve dört Şâmî yorgan ve iki beledî döşek ve iki çarşeb ve üç yüz yasdığı ve iki peşkir ve iki sofra ve iki boğça ve üç yemek sofrası ve bir el sandal kaftan ve bir kadife tarbuş ve bir alaca mintan ve dört uçkur ve bir don ve yirmi yedi münakkaş makrama ve üç tencere ve dört sahan ve bir hamam tası ve iki sagīr sahan ve bir sini ve bir sagīr güğüm ve bir leğen ma‘a ibrik ve bir anteri ve iki tava ve iki lengerî vâlidesi merkūmenin yanında kalmakla eşyâ-yı merkūmeyi bi’l-vekâle mezbûreden taleb ve da‘vâ eylediğimde, ol dahi inkâr etmekle beynimizde nizâ‘-ı küllî vukū‘undan sonra muslihûn tavassut edip, da‘vâ-yı mezkûremden beni bi’l-vekâle zikr olunan eşyâdan bir bogasi ve bir hatâyî kaftan ve bir siyah sandale entari ve sekiz münakkaş makrama ve bir uçkur ve bir dülbend örtüsü ve dört sahan ve bir hamam tası ve bir leğen ma‘a ibrik ve iki yan keçesi ve bir peşkir ve bir iş makraması ve bir yüz yasdığı ve bir sofra ve bir minder ve bir döşek ve iki yorgan ve iki cedîd Bursa yasdığı ve bir sâde sîm ön kuşağı üzerlerinde sulh eylediklerinde, ol dahi sulh-ı mezbûru kabûl eyledikden sonra mâ‘adâsı olan eşyâ-yı mezkûreye ve mehr-i mu‘accel olmak üzre kendiye def‘ ve teslîm, olunan yirmi dokuz guruşa ve bi’l-cümle târih-i kitâba gelince beynimizde cereyân eden ahz u i‘tâya müte‘allika âmme-i da‘vâdan ben bi’l-vekâle mezbûrenin zimmetini ibrâ ve iskāt edip, ol dahi kızı mezbûrenin husûs-ı mezbûre müte‘allika âmme-i da‘vâdan kezâlik zimmetini ibrâ-i âmm-ı kātı‘ü’n-nizâ‘la ibrâ ve iskāt eyledi dedikde, gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb ve tahrîr, ba‘dehû ma‘an ba‘as olunan Yahya Çelebi b. Ahmed ve Mahmud b. Hasan ile meclis-i şer‘a gelip alâ vukū‘ihî inhâ ve takrîr etmeğin, mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Cumâdelâhire sene 1102. Şuhûdü’l-hâl: Bâki Çelebi b. Mustafa, Ali Çelebi b. Ebûbekir, Abdurrahman Çelebi b. Mehmed, Hasan Çelebi b. Mehmed, (…) İbrahim Çelebi b. Mustafa.