Bab Mahkemesi 54 Numaralı Sicil (H. 1102 / M. 1691) cilt: 20, sayfa: 334 Hüküm no: 400 Orijinal metin no: [69b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Bey b. Şaban sağ olduğu halde öldü zannıyla karısıyla evlenen ve onun ölümüyle de mirasına konan Mustafa Beşe b. Abdülkerim’den mirası geri aldığı Mahmiye-i İstanbul’da Manisalı Çelebi mahallesinde sâkine iken bundan akdem vefât eden Ayşe Hâtun bt. Bayram b. Abdullah’ın zevc-i metrûku Ahmed Bey b. Şaban nâm kimesne meclis-i şer‘-i şerîf-i enverde, işbu bâ‘isü’l-kitâb Mustafa Beşe b. Abdülkerim mahzarında ikrâr ve takrîr-i kelâm edip, bundan akdem ben âhar diyârda iken benim fevt oldu[ğum] mülâhazasıyla mezbûre Ayşe hayâtında nefsini mezbûr Mustafa Beşe’ye tezevvüc ve taht-ı nikâhında iken fevt olmağla, merkūm Mustafa Beşe hisse-i irsiye olmak zu‘muyla terekesinden bin altmış akçe ahz u kabz etmişidi. Hâlâ ben hayyen gelip, merkūm Mustafa Beşe ile ba‘de’l-murâfa‘a ve’l-isbât meblağ-ı mezbûr bin altmış akçeyi mezbûr Mustafa Beşe yedinden tamâmen ahz u kabz eylediğimden sonra ba‘de’l-yevm müteveffâ-yı merkūmenin terekesine müte‘allika âmme-i da‘vâdan merkūm Mustafa Beşe’nin zimmetini ibrâ-i âmm-ı râfi‘ü’l-hisâm ile ibrâ ve iskāt edip ve merkūm Mustafa Beşe dahi kezâlik cemî‘u’d-de‘âvî benim zimmetimi ibrâ ve iskāt eyledi dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min Cumâdelâhire sene 1102. Şuhûdü’l-hâl: Halil b. Mehmed, Hasan Çelebi b. Receb, İbrahim Çelebi b. Ahmed, İbrahim b. Mehmed, Ali (…).