Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 285 Hüküm no: 253 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Ali’nin mehrini kocasına hibe ettiği ve malının üçte birinden vasiyette bulunduğu Husûs-ı âti’l-beyânı mahâllinde ketb ü terkīm için savb-ı şer‘-i kavîmden bi’t-taleb irsâl olunan İmâmzâde Mehmed Efendi mahmiye-i İstanbul’da Derviş Ali Mahallesi’nde sâkin umdetü’l-eşbâh ve’l-a‘yân el-Hâc Kemâleddin Ağa b. Müyesser’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i Nebevî etdikde mezbûr el-Hâc Kemâleddin Ağa’nın halîlesi Âişe Hatun bt. Ali zâtını ma‘rifet-i şer‘iye ile ârifân olan Hüseyin Çelebi b. Üveys ve Abdullah b. Abdüsselam ta‘rîfleriyle mu‘arrefe oldukdan sonra meclis-i ma‘kūd-ı mezbûrda işbu bâ‘isü’l-kitâb merkūm el-Hâc Kemâleddin Ağa mahzarında bi-tav‘ihâ ikrâr-ı tâm ve takrîr-i kelâm edip zevcim el-Hâc Kemâleddin Ağa zimmetinde mütekarrir ve ma‘kūdün-aleyh olan yüz esedî guruş mehr-i müeccelimden doksan sekiz esedî guruşunu hîbetü’d-deyni mimmen aleyhi’d-deynü sahîhatün mısdâkınca mezbûr el-Hâc Kemâleddin Ağa’ya hîbe-i sahîha-i şer‘iye ile hîbe ve temlîk ol dahi meclis-i hîbede ittihâb ve kabûl eyledi ve mezbûr el-Hâc Kemâleddin Ağa zimmetinde bir akçe ve bir habbe sâir ahz ü i‘tâdan hakkım olmayıp ve hâlâ şöyle ta‘yîn eyledim ki emr-i Rabbânî ve fermân-ı Samedânî ile terk-i âlem-i fânî eylediğimde sülüs mâlımdan yüz guruşu ifrâz ve mu‘tâd-ı muvahhidât üzre mesârif-i defnime harc ve sarf ve mâ‘adâsı vücûh-ı birre sarf oluna ve kezâlik sülüs mâlımdan mu‘tekam Kâtibe bt. Abdullah’a dört köhne yasdık ikisi çatma ve ikisi yemenî olmak üzre ve iki minder ve bir beledî döşek ve bir orta keçesi ve iki tencere ve iki sahan ve iki münakkaş yorgan ve bir döşek çârşebi ve bir şam‘dân ve bir tepsi ve bir gül kutusu ve bir hamam tası ve nakid otuz guruş ve müdebberem Gülistan bt. Abdullah’a dahi iki yasdık ve bir minder ve bir alaca döşek ve iki yorgan ve bir köhne zıbın ve bir köhne keçe ve iki tencere ve iki sahan ve bir şam‘dân ve bir tepsi ve nakid yirmi guruş verile deyü vasiyet edip bu vasiyetimi tenfîze mezbûr el-Hâc Kemâleddin Ağa’yı vasîyy-i muhtâr nasb ve ta‘yîn edip ol dahi vesâyet-i mezbûreyi kabûl ve merâsimini kemâ-yenbagī edâya ta‘ahhüd eyledi dedikde gıbbe’t-tasdîkı’ş-şer‘î vâki‘ hâli mezbûr Mehmed Efendi mahâllinde ketb ve terkīm edip ba‘dehû cânib-i şer‘den ma‘an irsâl olunan Ali b. Abdullah ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-işrîn min-Saferü’l-hayr li-sene ihdâ ve tis‘în ve elf. Şuhûdü’l-hâl: Hüseyin Çelebi b. Üveys, Keçeci Ali Dede, Müezzin Mustafa Çelebi b. ( ), el-Hâc Mustafa b. Hasan, Aşıcı İbrahim Bey, Ali [b.] Abdullah, Şeyhî İbrahim, Mehmed (...), Mehmed Efendi b. Mustafa, Ahmed Çelebi b. Piyale, Ahmed Çelebi b. Haydar.