Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 286 Hüküm no: 254 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahman adlı küçük çocuğun eski vasîsi olan Saliha bt. Abdullah’ın Abdurrahman’a ait olan parayı vasîsi Mehmed Ağa’ya teslim etmesi Allahu hasbî El-emru kemâ-hüve’l-muharreru fîh harrerehû el-me’mûr bi-istimâ‘i hâzihi’l-kazıyye Mehmed el-kādî sâbıkā bi-medîneti Kostantıniyye el-mahmiye -ufiye anhü ve gufire lehû-. Sebete mazmûnühû indî harrerehû el-fakīr ileyhi Sübhânehû Hâmid el-kādî bi-askeri Rumeli -ufiye anhü-. Husûs-ı lâhıku’l-beyânın istimâ‘ı için bu fakīre hitâben fermân-ı cihân-mutâ‘ vârid olmağın mahmiye-i İstanbul’da Nahılbend Mahallesi’nde sâkin iken bundan akdem vefât eden Mehmed Efendi’nin verâseti zevceteyn-i metrûketeyni Sâliha bt. Abdullah ve Hidayetullah bt. Abdullah ile sulbî sagīr oğlu Abdurrahman ile bundan akdem gāib olan sulbî kebîr oğlu Abdullah’a münhasıra olduğu şer‘an mütehakkık oldukdan sonra sagīr-i mezbûr Abdurrahman’ın tesviye-i umûruna kıbel-i şer‘-i enverden mansûb vasîsi olan Mehmed Ağa b. Ahmed Efendi husûs-ı mezkûr için akd olunan meclis-i şer‘-i hatîrde zâtını ma‘rifet-i şer‘iye ile ârifân mahalle-i mezbûre sükkânından Abdurrahman Efendi b. Halil ve Sunullah Çelebi b. Hamza Efendi ta‘rîfleriyle mu‘arrefe olan mezbûre Sâliha mahzarında üzerine da‘vâ ve takrîr-i kelâm edip müteveffâ-yı mezbûr Mehmed Efendi vefâtından iki sene mukaddem hâl-i hayat ve nefâz-ı tasarrufâtında mâlından iki bin kıt‘a esedî ve iki bin kıt‘a sivilye ta‘bîr olunur riyâlî guruşunu oğlu sagīr-i mezbûr Abdurrahman’a hîbe-i sahîha-i şer‘iye ile hîbe ve temlîk ve yine velâyeten kendisi ittihâb ve kabûl ve kabz ve işhâd edip ba‘dehû fevt oldukda mezbûre Sâliha sagīr-i mezbûrun vasîsi olmağla meblağayn-ı mezkûreyn iki bin esedî ve iki [bin] riyâlî guruşu ahz ü kabz edip hâlâ mezbûre Sâliha vesâyetden azlolunup yerine ben vasî nasb olunmağla meblağayn-ı mezkûreyn iki bin esedî ve iki bin riyâlî guruşu sagīr-i mezbûr için bana teslîm üzerine lâzım olmağla taleb ederim dedikde gıbbe’s-suâl mezbûre Sâliha cevâbında meblağayn-ı mezkûreyn iki bin esedî ve iki bin riyâlî guruşu kabzını ve müteveffâ-yı mezbûr Mehmed Efendi vefâtından iki sene mukaddem hâl-i hayat ve nefâz-ı tasarrufâtında iki bin esedî guruşu oğlu sagīr-i mezbûr Abdurrahman’a minvâl-i muharrer üzre hîbe ve temlîk ve ba‘dehû velâyeten ittihâb ve kabûl ve kabz ve işhâd etdiğini ikrâr ve iki bin riyâlî guruşu vech-i muharrer üzre sagīr-i mezbûra hîbe ve temlîk ve yine velâyeten ittihâb ve kabûl ve kabz ve işhâd etdiğini inkâr edip müteveffâ-yı mezbûr Mehmed Efendi maraz-ı mevtinde meblağ-ı mezkûr iki bin riyâlî guruşu oğlum gāib-i mezbûr Abdullah’a hîbe eyledim deyü ikrâr edip lâkin maraz-ı mevtinde olmağla vasiyet li’l-vâris hükmünde olup nâfiz olmamağla meblağ-ı mezbûr iki bin sivilye ta‘bîr olunur riyâlî guruşun on altı sehminden bir sehmi olan yüz yirmi beş guruşu bana ve bir sehmi olan yüz yirmi beş guruşu âhar zevcesi mezbûre Hidayetullah’a ve yedi sehmi olan sekiz yüz yetmiş beş guruşu oğlum gāib-i mezbûr Abdullah’a ve yedi sehmi olan sekiz yüz yetmiş beş guruşu sagīr-i mezbûr Abdurrahman’a isâbet ve intikāl eden ve ben oğlum gāib-i mezbûr Abdullah’a babası müteveffâ-yı mezbûr Mehmed Efendi’den ırsen isâbet ve intikāl eden hisse-i şer‘iyesini ahz ü kabz ve hıfza kıbel-i şer‘den mansûbe kayyım olmağla sagīr-i mezbûr Abdurrahman’ın hakk-ı mevhûbu olan meblağ-ı mezkûr iki bin esedî guruş ile zikrolunan iki bin riyâlî guruşdan hisse-i şer‘iyesi olan sekiz yüz yetmiş beş riyâlî guruşu hâlâ vasîyy-i mezbûr Mehmed Ağa’ya teslîm üzerime lâzım olup mâ‘adâ bin yüz yirmi beş guruşu teslîm üzerime lâzım değildir deyü cevâb vermeğin vasîyy-i mezbûr Mehmed Ağa’dan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup mahalle-i mezbûre sükkânından olan el-Hâc Mehmed Ağa b. Mustafa ve Tâcir Mehmed Çelebi b. Halil ve Hüseyin Çelebi b. İsa ve Ebûbekir Ağa b. Abdullah nâm kimesneler li-ecli’ş-şehâde meclis-i mezbûra hâzırûn olup gıbbe’l-istişhâd fi’l-hakīka müteveffâ-yı mezbûr Mehmed Efendi vefâtından iki sene mukaddem hâl-i hayat ve nefâz-ı tasarrufâtında mâlından iki bin kıt‘a esedî ve iki bin kıt‘a sivilye ta‘bîr olunur riyâlî guruşu sulbî oğlu sagīr-i mezbûr Abdurrahman’a bizim huzûrumuzda hîbe-i sahîha-i şer‘iye ile hîbe ve temlîk ve yine kendisi velâyeten ittihâb ve kabûl ve kabz edip bizi işhâd eyledi hâlâ meblağayn-ı mezkûreyn iki bin riyâlî guruşu tamamen sagīr-i mezbûr (...) [Abdurrahman] için vasîyy-i mezbûr Mehmed Ağa’ya teslîme mezbûre Sâliha’nın üzerine (...) (...) (...) biz bu vech üzre şâhidleriz [69b] şehâdet dahi ederiz deyü her biri edâ-i şehâdet-i şer‘iye etdiklerinde şühûd-ı mezbûrûnun keyfiyet-i hâllerini tefahhus ve suâl için irsâl olunan Mevlânâ Yusuf Efendi b. Mehmed mahalle-i mezbûreye varıp ahâlîsinden İmâm Mehmed Efendi b. İsmail ve Receb Efendi b. Mustafa ve Mehmed b. Sefer nâm kimesnelerden şühûd-ı mezbûrûn el-Hâc Mehmed Ağa ve Tâcir Mehmed Çelebi ve Hüseyin ve Ebûbekir Ağa’nın keyfiyet-i hâllerini tefahhus ve suâl etdikde her biri adl olup velev aleynâ makbûletü’ş-şehâdelerdir deyü haber verdiklerini mahâllinde tahrîr ba‘dehû ma‘an irsâl olunan el-Hâc Ahmed b. İsa ile gelip alâ-vukū‘ihî inhâ ve takrîr etdiklerinde sırren ve alenen ta‘dîl ve tezkiye olunup şehâdetleri makbûle olmağın meblağayn-ı mezkûreyn iki bin esedî ve iki bin sivilye ta‘bîr olunur riyâlî guruşun a‘yânı mevcûde ise a‘yânını müstehlek ise emsâlini vasîyy-i mezbûr Mehmed Ağa’ya tamamen teslîme mezbûre Sâliha’ya tenbîh birle mâ-vaka‘a bi’t-taleb ketb olundu. Fi’l-yevmi’s-sânî min-şehri Recebi’l-mürecceb li-sene sitte ve semânîn ve elf. Şuhûdü’l-hâl: Umdetü’l-müderrisîni’l-kirâm Mustafa Efendi b. el-merhûm Abdullah Efendi, fahrü’l-müderrisîni’l-kirâm Süleyman Efendi, fahrü’l-müderrisîn Abdülbaki Efendi b. Mehmed, fahrü’l-müderrisîn es-Seyyid Halil Efendi b. Mehmed Efendi.