Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 288 Hüküm no: 255 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Ahmed ile Ayşe bt. Abdullah’ın alacak davasında sulh olup birbirlerini ibra ettikleri Mahmiye-i İstanbul’da Cerrahpaşa Câmi‘-i Şerîfi kurbünde Hacı Ahmed Mahallesi’nde sâkin Mustafa b. Ahmed nâm kimesne meclis-i şer‘-i hatîrde Çerâğī Hamza Mahallesi’nde sâkin iken bundan akdem vefât eden Uzun İbrahim Ağa b. Ali’nin zevce-i menkûhası ve vârisesi olmağla terekesine vâzı‘atü’l-yed olan Âişe bt. Abdullah tarafından zikri âtî husûsa vekîl olup zât-ı mezbûreyi ma‘rifet-i şer‘iye ile ârifân olan yine mahalle-i mezbûre ahâlîsinden Şa‘ban b. Ahmed ve Ali b. Yusuf şehâdetleriyle şer‘an vekâleti sâbite olan İbrahim b. Mehmed mahzarında ikrâr ve i‘tirâf edip mahalle-i mezbûrede sâkin iken bundan akdem vefât eden Esîr Hüseyin Ağa b. Abdullah zimmetinde yedimden hayatında iştirâ ve kabz eylediği cins ve vasfı beynimizde ilm-i şer‘î ile ma‘lûm esir bahâsından yedi yüz esedî guruş hakkım[ı] kable’l-edâ fevt olup mahalle-i mezbûrede vâki‘ lede’l-ahâlî ma‘lûmü’l-hudûd büyût-ı adîdeyi müştemil nısf mülk menzili düyûnu için bey‘ olundukda semeninden zikrolunan yedi yüz guruş hakkımı taleb eylediğimde mezbûr İbrahim Ağa meblağ-ı mezkûr yedi yüz esedî guruş hakkıma kefâlet-i sahîha-i şer‘iye ile kefîl olup min-ciheti’l-kefâle deyn-i mezbûru kezâlik kable’l-edâ mezbûr İbrahim Ağa dahi vefât edip tereke-i vâfiyesini mezbûre Âişe kabz etmekle kefâlete binâen meblağ-ı mezbûru merkūme Âişe’den taleb ve da‘vâ eylediğimde inkâr edip ben-dahi müdde‘âmı vekîli mezbûr İbrahim muvâcehesinde mahmiye-i mezbûrede Ördek Kasab Mahallesi’nde sâkin İbrahim b. Mustafa ve Mahmud b. el-Hâc Ali şehâdetleriyle şer‘an isbât eylediğimden sonra vekîl-i merkūm müteveffâ-yı evvel-i mezkûr Esîr Hüseyin Ağa düyûnu terekesini müstağraka olup müflisen fevt olmağla meyyit-i müflise kefâlet-i sahîha olmadığından mâ‘adâ mezbûr benim için târih-i kitâbdan yedi ay mukaddem müteveffâ-yı mezbûr zimmetinde cihet-i mezbûreden iki yüz kırk esedî guruşdan gayrı hakkım yokdur deyü ikrâr dahi etmişidin deyü beyândan âciz ve ben-dahi bey‘ olunan menzil rehin olmağla semeninden rehin olduğu deyn edâ olundukdan sonra yedimde olan keşif hücceti nâtıka olduğu üzre iki yüz kırk esedî guruş fazla kaldığını beyân olunup ba‘de’t-tahlîf meblağ-ı mezbûr bana hükmolundukdan sonra bakiyye hakkım olan dört yüz altmış guruşu dahi taleb eylediğimde muslihûn tavassut edip merkūme Âişe ile beynimizde iki yüz on esedî guruş üzerine akd-i musâlaha olundukda ben-dahi sulh-i mezbûru kabûl ve mahkûmun-bih ve bedel-i sulh cem‘an dört yüz elli esedî guruşu işbu meclis-i şer‘de vekîl-i mezbûr yedinden tamamen alıp kabz edip ziyâdeye müte‘allika âmme-i de‘âvî ve muhâsamât ve eymân ve mutâlebâtdan müteveffiyân-ı mezbûrânı ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mezbûr İbrahim dahi meclis-i şer‘de merkūm Mustafa mahzarında bi’l-vekâle ikrâr ve i‘tirâf edip müvekkilem mezbûre dahi ber-vech-i meşrûh medfû‘u olan meblağ-ı mezbûra müte‘allik mezbûr Mustafa ile bi-vechin mine’l-vücûh da‘vâ ve nizâ‘ı olmayıp meblağ-ı mezbûra müte‘allika âmme-i da‘vâdan mezbûru ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Mehmed Çavuş b. Mehmed, el-Hâc Mehmed b. Çavuş b. ( ), el-Hâc Ali Çavuş b. Mustafa, el-Hâc Mustafa b. Abdullah, Ahmed Çelebi b. Abdullah, el-Hâc Abdullah b. (...), el-Hâc Yusuf b. Çavuş b. Hasan, İbrahim Ağa b. Ali.