Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 289 Hüküm no: 256 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Paşazâde Abdülkadir Paşa’nın vefat eden Uzun Halil b. Şükrullah’a olan borcunu onun varislerine ödemesi Kalyon reislerinden olup bundan akdem Bahr-i Sefîd’de vefât eden Uzun Halil b. Şükrullah’ın verâseti zevce-i metrûkesi Belkıs bt. Abdullah ile sulbiye kebîre kızları Hadîce ve Âişe’ye ve li-ebeveyn kız karındaşı Zeyneb nâm hatuna münhasıra olup kable’l-kısme mezbûre Zeyneb dahi fevt olup verâseti mezbûretân Hadîce ve Âişe’ye münhasıra olduğu şer‘an zâhir ve müte‘ayyin oldukdan sonra mezbûrât Belkıs ve Hadîce ve Âişe zâtlarını ma‘rifet-i şer‘iye ile ârifân olan Mehmed b. Ahmed ve Ahmed b. Murad ta‘rîfleriyle mu‘arrefe oldukdan sonra meclis-i şer‘-i hatîr-i enverde ümerâ-i bahrden Ali Paşazâde Abdülkadir Paşa tarafından husûs-ı âti’l-beyâna vekîl olup Hızır b. Halil ve İbrahim Çavuş b. Hasan şehâdetleriyle şer‘an vekâleti sâbite olan Ali b. Sinan mahzarında her biri üzerine da‘vâ ve takrîr-i kelâm edip mûrisimiz müteveffâ-yı mezbûr Halil Reis’in müvekkil-i müşârün-ileyh Abdülkadir Paşa zimmetinde işbu yedimizde olan deyn temessükü nâtık olduğu üzre yedinden müşterâ ve makbûz beynlerinde ilm-i şer‘î ile ma‘lûm gulâm [ve] mercimek ve pirinç ve sâir zahîre bahâlarından min-haysü’l-mecmû‘ bin iki yüz esedî guruş hakkı olup kable’l-ahz vefât edip meblağ-ı mezbûr bi’l-irsi’ş-şer‘î bize isâbet etmeğin suâl olunup müvekkil-i mûmâ-ileyh meblağ-ı mezbûru bize edâ ve teslîm etmek üzre vekîl-i mezbûra tenbîh olunmak matlûbumuzdur dediklerinde gıbbe’s-suâl mezbûr Ali cevâbında fi’l-hakīka müvekkil-i müşârün-ileyhin mezbûr Halil Reis’e cihet-i mezkûreden min-haysü’l-mecmû‘ bin iki yüz esedî guruş lâzımü’l-edâ deyni olduğunu ikrâr lâkin mezbûr Halil Reis [zü]mre-i râcilînden olup bin seksen senesinde müvekkilim mûmâ-ileyh Kandiye kal‘ası limanında iken mezbûrun mevti şüyû‘ bulup ol tarafda verâseti olmamağla işbu hazır bi’l-meclis Süleyman Ağa b. Abdülmennan kal‘a-i mezbûrede yeniçeri beytü’l-mâl emîni bulunup ve müvekkilim mûmâ-ileyhden meblağ-ı mezkûru beytü’l-mâl için kabza buyruldu-i şerîf ile dahi me’mûr olmağla bi’l-emâne müvekkil-i mûmâ-ileyhden bi’t-tamam ahz ü kabz ve tesellüm eyledi deyücek merkūm Süleyman Ağa meblağ-ı mezbûru kabzını münkir ve vekîl-i mesfûr buyruldu ibrâz ve müdde‘âsını beyâna kādir olmayıp tahlîfe dahi taleb olmamağın mûcebiyle müvekkil-i müşârün-ileyh meblağ-ı mezbûru mezkûrâta edâ ve teslîm etmek üzre vekîl-i mezbûra tenbîh olunup mâ-vaka‘a bi’t-taleb ketb olundu. Fi’l-yevmi’s-sâdis min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Osman Ağa Muhzırbaşı, el-Hâc Kemâleddin Ağa b. Müyesser, Musa Efendi b. ( ), Ahmed Çelebi b. Abdurrahman.