Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 292 Hüküm no: 259 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski kocası Mehmed b. Hüseyin ile ikrah ile muhâlaa olduğunu iddia eden Ayşe bt. Nebi’nin davasının reddedildiği Mahmiye-i İstanbul’da Fethiye Câmi‘-i Şerîfi kurbünde sâkine olup zâtını ma‘rifet-i şer‘iye ile ârifân İbrahim Efendi b. Mehmed ve Veli b. Süleyman ta‘rîfleriyle mu‘arrefe olan Âişe bt. Nebi nâm hatun meclis-i şer‘-i hatîr-i lâzımü’t-tevkīrde sâbıkā zevci olan Mehmed b. Hüseyin nâm kimesne mahzarında üzerine da‘vâ ve takrîr-i kelâm edip mezbûr Mehmed bundan akdem zevcim olup zevciyet beynimizde kāime iken târih-i kitâbdan kırk gün mukaddem mehr-i müeccelin ve nafaka-i iddetin üzerlerine ve meûnet-i süknân dahi kendi üzerine olmak üzre benim ile muhâla‘a ol deyü mezbûr Mehmed beni darb ve darb-ı şedîd ile tehdîd etmekle ben-dahi mezbûrun zimmetinde mütekarrir ve ma‘kūdün-aleyh olan iki bin akçe mehr-i müeccelim ve nafaka-i iddetim üzerlerine ve meûnet-i süknâm dahi kendi üzerime olmak üzre mezbûr Mehmed ile muhâla‘a edip ol dahi hul‘-ı mezbûru kabûl eyledikden sonra hukūk-ı zevciyete müte‘allika da‘vâdan her birimiz âharın zimmetini ibrâ ve ıskāt etmişidik lâkin hul‘-ı mezbûr ber-vech-i muharrer ikrâh ile olmağla hâlâ mezbûr Mehmed’e suâl olunup kerh-i mezbûruna binâen mehrim olan meblağ-ı mezbûrun alıverilmesi matlûbumdur dedikde gıbbe’s-suâl mezbûr Mehmed cevâbında mezbûr Âişe zevce-i menkûhası olup târih-i merkūmda kendi ile muhâla‘a olup hukūk-ı zevciyete müte‘allika da‘vâdan her biri âharın zimmetini ibrâ ve ıskāt eylediğini ikrâr lâkin kerh-i mezbûru inkâr edicek müdde‘iyye-i mezbûreden müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka müdde‘iyye-i mezbûreyi ve nafakan üzerlerine ve meûnet-i süknân dahi kendi üzerine olmak üzre benim ile hul‘ ol deyü darb ve darb-ı şedîd ile tehdîd etmeyip ikrâh ile hul‘ olmadığına merkūm Mehmed’e yemîn teklîf olundukda ol dahi hasbe’l-mesûl yemîn billâhi’l-aliyyü’l-a‘lâ etmeğin mûcebiyle müdde‘iyye-i mezbûre bilâ-beyyine bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’t-tâsi‘ min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: İbrahim Efendi b. Mehmed, Veli? b. Süleyman, Mehmed Çelebi b. Haydar, Ahmed Çelebi b. Piyale.