Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 293 Hüküm no: 260 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi b. Abdullah’ın evini Receb Ağa b. Ali’ye istiğlal yoluyla sattığı Husûs-ı âti’l-beyânın mahâllinde tahrîri iltimâs olunmağın savb-ı şer‘-i mergūbdan irsâl olunan Mevlâ[nâ] Hüseyin Efendi b. Himmet mahmiye-i İstanbul’da Tevkī‘î Cafer Çelebi Mahallesi’nde sâkin Receb Ağa b. Ali’nin menziline varıp zeyl-i kitâbda muharrerü’l-esâmî olan Müslimîn huzûrlarında akd-i meclis-i şer‘-i mübîn eyledikde mahmiye-i mezbûrede Yenibahçe kurbünde Karabaş Mahallesi sükkânından Ali Çelebi b. Abdullah nâm kimesne meclis-i ma‘kūd-ı mezbûrda bâ‘isü hâze’l-kitâb mezbûr Receb Ağa mahzarında bi-tav‘ihiikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup zikrolunan Karabaş Mahallesi’nde vâki‘ bir tarafdan Havva Hatun vakfı ve iki tarafdan İbrahim Çelebi mülkü ve bir tarafdan tarîk-ı âm ile mahdûd olup hâriciyede fevkānî iki bâb odayı ve tahtânî bir bâb odayı, dâhiliyede fevkānî iki bâb odayı ve tahtânî bir bâb odayı ve bir matbahı ve bir su kuyusunu ve bir mikdâr havluyu müştemil olan mülk menzilimi bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık tarafeynden îcâb ve kabûlü hâvî iki yüz kıt‘a esedî guruşa bi-tarîkı’l-istiğlâl mezbûr Receb Ağa’ya bey‘ ve teslîm ol dahi iştirâ ve tesellüm eylediğinden sonra semeni olan meblağ-ı mezbûr iki yüz esedî guruşu mezbûr Receb Ağa bana def‘ ve teslîm ben-dahi tamamen ba‘de’l-ahz ve’l-kabz mezbûr Receb Ağa menzil-i mahdûd-ı mezbûru ba‘de’t-tahliyeti’ş-şer‘iye ve’t-takābuzı’l-mer‘î târih-i kitâbdan iki sene tamamına değin altmış esedî guruşa bana îcâr ve teslîm ben-dahi istîcâr ve tesellüm eyledim dedikde gıbbe’t-tasdîkı’ş-şer‘î mezbûr Ali Çelebi meclis-i ma‘kūd-ı mezbûrda merkūm Receb Ağa’nın li-ebeveyn karındaşı Ahmed Beşe mahzarında ikrâr ve takrîr-i kelâm edip meblağayn-ı mezbûreyni müddet-i mezbûre tamamında merkūm Receb Ağa’ya edâ ve teslîm edemezsem menzil-i mezbûru semen-i misli ile bey‘ ve kabz-ı semene ve semeninden deynim olan meblağayn-ı mezbûreyni merkūm Receb Ağa’ya edâya ve fazla kalırsa bana îsâle ve kabz ve îsâl mütevakkıf olduğu umûrun küllîsine küllemâ azeltüke fe-ente vekîlî mazmûnu üzre azl ve in‘izâlden masûne vekâlet-i devriye ile tarafımdan mezbûr Ahmed Beşe’yi vekîl ve nâib-i menâb nasb ve ta‘yîn eyledim dedikde ol dahi vekâlet-i mezbûreyi kabûl ve merâsimini edâya ta‘ahhüd ve iltizâm eylediğini mevlânâ-yı mezbûr mahâllinde tahrîr ba‘dehû ma‘an irsâl olunan Abdülfettah ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-âşir min-Rebî‘i’l-evvel li’s-seneti’l-mezbûre. Şuhûdü’l-hâl: Fahrü’l-kuzât Muslı Efendi, el-Hâc Abdülfettah el-müezzin, Attar Ahmed Çelebi b. Ömer, Hüseyin Efendi el-Kādî, Ahmed Çelebi b. Mustafa, Mahmud Çelebi Berber, Mehmed Beşe b. Ali, Berber Halil Çelebi.