Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 295 Hüküm no: 262 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat ettiğinde Muharrem b. Hüseyin tarafından teslim alınan Receb Ağa b. Mehmed’e ait eşyaların adı geçen Muharrem’in kefili Hamza b. Mustafa’dan teslim alınması Mahmiye-i İstanbul’da Akbıyık Mahallesi ahâlîsinden olup Vilâyet-i Anadolu’da medîne-i Kilis’de bundan akdem vefât eden Receb Ağa b. Mehmed nâm müteveffânın sulbiye sagīre kızı Ümmühani’nin tesviye-i umûru için kıbel-i şer‘den mansûb vasîsi olan işbu bâ‘isü’l-kitâb Abdülvahhab Çelebi b. el-Hâc Abdi meclis-i şer‘-i hatîrde Hamza b. Mustafa nâm kimesne mahzarında üzerine da‘vâ ve takrîr-i kelâm edip mezbûr Receb Ağa medîne-i mezkûrede vefât etdikde Muharrem b. Hüseyin nâm kimesne yanında bulunmağla terekesinden yüz otuz beş dirhem sebkî sîm ve iki zer-nişânlı gaddâre ve iki zer-nişânlı kılıç ve bir sîm gaddâre ve bir savadlı sîm gaddâre ve bir sîm kılıç ve iki sîm balta ve bir çuka yağmurluk ve bir yeşil çukaya kaplı zerdâve kürk ve bir kırmızı çukaya kaplı boğaz kürk ve def‘a sâde boğaz kürk ve bir sibir kürk ve bir sincâbî kapama ve bir mor ferâce ve bir zümrüdî çuka kereke ve bir erguvânî kereke ve bir donluk kırmızı Londirine çuka ve bir yeşil çuka ve iki zer-bâft kuşak ve bir kırmızı kereke ve bir kırmızı Cezâyir kuşağı ve bir haydarî raht ma‘a reşme ve bir kemer raht ma‘a reşme ve bir boğaz kürk ve bir paça kürk ve iki donluk çuka ve bir aylı günlü sâ‘at ve bir câriye ve İvaz ve Dilaver ve Yusuf nâm üç re’s gulâmlar ve bir re’s doru at ve sâir hüccet nâtık olduğu eşyâ ile bin üç yüz elli iki esedî guruşunu ahz ü kabz ve tesellüm edip mahmiye-i mezbûreye geldiğinde meblağ-ı mezbûr ile eşyâ-i mezkûreyi merkūm Muharrem’den taleb eylediğimde merkūm huzûr-ı hâkimü’ş-şer‘de meblağ-ı mezbûr ile eşyâ-i mezkûrenin mecmû‘unu ber-vech-i muharrer kabz ve tesellüm edip mecmû‘u kendi yedinde mazbûta idüğünü bi’t-tav‘i’s-sâf ikrâr ve meblağ-ı mezbûr bin üç yüz elli iki esedî guruşunu mezbûrdan tahsîl ve bana teslîme mübâşir ta‘yîn buyrulan işbu hazır bi’l-meclis Mehmed Çavuş b. Ahmed yediyle bana teslîm ben-dahi bi’l-vesâye ahz ü kabz edip eşyâ-i mezkûre Halebü’ş-şehbâ’da kendi sâkin olduğum mahaldedir getireyim demekle mezbûr Hamza dahi müdde‘âm olan mâla emir ve kabûlü hâviye kefâlet-i sahîha-i şer‘iye ile kefîl olmuşidi el-hâletü hâzihî a‘yân-ı mazmûneye kefâlet-i sahîha olmağın suâl olunup eşyâ-i mezkûre mevcûd ise a‘yânını değil ise ba‘de’s-sübût kıymet-i şer‘iyelerini bi-hükmi’l-kefâle bana teslîme mezbûr Hamza’ya tenbîh olunmak matlûbumdur deyü merkūm Muharrem’in eşyâ-i mezkûre ile meblağ-ı mezbûru ber-vech-i meşrûh i‘tirâfını mütenebbih bir kıt‘a hüccet-i şer‘iye ibrâz etmeğin gıbbe’s-suâl mezbûr Hamza cevâbında vasîyy-i mezbûr bundan akdem eşyâ-i muharrere-i mezkûre ile meblağ-ı mezbûr bin üç yüz elli iki esedî guruşu gāib-i mezkûrdan bi’l-vesâye taleb ve da‘vâ eylediğine ikrâr ve meblağ-ı mezbûru edâ ve teslîm ve eşyâ-i mezkûreyi dahi teslîme ta‘ahhüd ve kendi dahi mezbûr Muharrem’in ancak nefsine kefîl olup ve merkūm Muharrem altı aydan beri gaybet-i munkatı‘a ile gāib olduğunu ikrâr lâkin mâla kefâletini inkâr edicek müdde‘î-i mezbûrdan müdde‘âsına beyyine taleb olundukda udûl-i Müslimînden olup mahmiye-i mezbûrede Emin Nureddin Mahallesi’nde sâkin Vâ‘iz Ahmed Efendi b. Hamza ve Ali Paşa-yı Atîk Mahallesi’nde sâkin Ömer Ağa b. Ahmed ve Kasımpaşa’da Başhâne Mahallesi’nde sâkin el-Hâc İbrahim b. el-Hâc Mehmed nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ işbu vasîyy-i mezbûr Abdülvahhab Çelebi gāib-i mezkûr Muharrem’den meblağ-ı mezbûr ile bâlâda ketb ü terkīm olunan eşyâyı bi’l-vesâye taleb ve da‘vâ etdikde ol dahi ber-vech-i muharrer kabzını ba‘de’l-i‘tirâf meblağ-ı mezkûru edâ ve eşyâ-i merkūmeyi dahi teslîme ta‘ahhüd ve a‘yân-ı mesfûra bizim huzûrumuzda işbu mezkûr Hamza emir ve kabûlü hâviye kefâlet-i sahîha-i şer‘iye ile kefîl oldu biz bu husûsda bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde şühûd-ı mezkûr[û]nu mahâllinde ta‘dîl ve tezkiye için savb-ı şer‘-i kavîmden irsâl olunan Mustafa Efendi b. Abdülaziz evvelâ zikrolunan Emin Nureddin Mahallesi’ne varıp ahâlîsinden Mustafa Efendi b. Hızır ve Yusuf b. Abdullah ve Ali Çelebi b. Ramazan ve İbrahim b. Mehmed ve Mustafa Çelebi b. Osman ve Yusuf b. Abdullah ve Ahmed Çelebi b. Mehmed’[den] mezbûr Ahmed Efendi’nin keyfiyet-i hâlini istihbâr etdikde mezbûrun adl ve makbûl-i şehâd[e] olduğunu her biri haber verdikden sonra Ali Paşa-yı Atîk Mahallesi’ne varıp ahâlîsinden Mehmed Ağa b. Ebîbekir ve Receb Ağa b. Ali ve Mehmed b. İbrahim ve el-Hâc Ahmed b. İsa ve Ahmed Bey b. Abdullah’dan şâhid-i mezbûr Ömer Ağa’nın keyfiyet-i hâlini istifsâr etdikde mezkûrun adl ve makbûlü’ş-şehâde olduğunu her biri haber vermeğin zikrolunan Kasımpaşa’da Câmi‘-i Kebîr Mahallesi’ne varıp ahâlîsinden İmâm Ömer Efendi b. Ahmed ve İvaz Efendi b. Halil ve Attar Hasan Çelebi b. Yusuf ve Mehmed Çelebi b. İshak ve Attar Ahmed Çelebi b. Mustafa ve Ramazan Çelebi b. Abdullah ve Abdülkerim Efendi b. Mehmed ve es-Seyyid Emrullah Çelebi b. Mustafa nâm kimesnelerden merkūm el-Hâc İbrahim’in keyfiyet-i hâlini istihbâr etdikde mezbûrun adl ve makbûlü’ş-şehâde olduğunu her biri haber vermeğin vâki‘ hâli mezbûr Mustafa Efendi mahâllinde ketb ü terkīm edip ba‘dehû cânib-i şer‘den ma‘an irsâl olunan Mehmed b. Mustafa ile meclis-i şer‘a gelip [alâ]-vukū‘ihî inhâ ve takrîr etmeğin emr-i ta‘dîl ve tezkiye tamam ve şehâdetleri makbûle ve a‘yân-ı mazmûneye kefâlet-i sahîha olmağın mûcebiyle ba‘de’l-hükmeşyâ-i mezkûre mevcûde ise a‘yânını değil ise ba‘de’s-sübût kıymet-i şer‘iyelerini bi-hükmi’l-kefâle teslîme mezbûr Hamza’ya tenbîh olunup mâ-vaka‘a bi’t-taleb ketb olundu. Fî-evâili şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Mehmed Ağa b. Ahmed el-Mübâşir, Ali Bey b. Hasan, Sefer b. Mehmed, Mehmed Çelebi b. Yusuf, Mehmed Çelebi b. Haydar, Musa Efendi b. Receb.