Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 297 Hüküm no: 263 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın evini Sinan Paşa Mahallesi avârızının mütevellisi olan Abdullah Efendi b. Mehmed’e istiğlal yoluyla sattığı Mahmiye-i İstanbul’da Sinan Paşa Mahallesi’nde sâkine Âişe bt. Abdullah nâm hatunun zevci ve tarafından husûs-ı âti’l-beyâna vekîl olduğu mezbûrenin zâtını ma‘rifet-i şer‘iye ile ârifân Ahmed b. Mehmed ve Feyzullah Beşe b. Abdullah nâm kimesneler şehâdetleriyle şer‘an vekâleti sâbite olan Ali Beşe b. Mehmed nâm kimesne meclis-i şer‘-i hatîr-i lâzımü’t-tevkīrde mahalle-i mezbûre avârızının bi’l-fi‘il mütevellîsi olan işbu sahibü’l-kitâb İmâm Abdullah Efendi b. Mehmed mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin silk-i (...) [mülkümde münselik olup mahalle-i] mezbûrede vâki‘ bir tarafından Ali Çelebi b. Ahmed mülkü ve bir tarafından (...) (...) veresesi mülkleri ve tarafeyn-i âhareyni tarîk-ı âm ile (...) [mahdûd] dâhiliyesinde üç bâb fevkānî oda ve bir tahtabend ve bir su kuyusu (...) [ve kenîfi] ve hâriciyesinde bir bâb [72a] fevkānî oda ve bir mahtab ve kenîfi müştemil mülk menzilimi bi-cümleti’t-tevâbi‘ ve’l-levâhık mütevellî-i mezbûr Abdullah Efendi’ye bi-tarîkı’l-istiğlâl seksen beş esedî guruşa bey‘ ve teslîm ol dahi ber-vech-i muharrer iştirâ ve tesellüm eyledikden sonra semeni olan meblağ-ı mezbûr seksen beş esedî guruşu mütevellî-i mezbûr mal-ı vakf-ı mezbûrdan bana edâ ve teslîm ben-dahi yedinden tamamen ahz ü kabz eylediğimden sonra mütevellî-i mezbûr Abdullah Efendi menzil-i mahdûd-ı mezbûru gıbbe’t-tahliyeti’ş-şer‘iye ve’t-takābuzı’l-mer‘î beher mâh yüz yirmi yedişer akçe olmak üzre târih-i kitâbdan üç yüz altmış gün tamamına değin bin beş yüz yirmi dört akçeye bana îcâr ve teslîm ben-dahi ber-vech-i muharrer istîcâr ve tesellüm eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Ahmed Çelebi b. Mustafa, Bağcızâde İbrahim Beşe el-Attar, Mustafa Çelebi el-Hayyât, el-Hâc Veli el-Attar, Ahmed Çelebi b. Piyale, Mehmed Çelebi b. Haydar.