Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 298 Hüküm no: 264 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Şaban’ın evini, torunu Mehmed b. Halil’e satıp parasını da hibe ettiği Mahmiye-i İstanbul’da Muhtesib İskender Mahallesi’nde sâkine İsmihan bt. Şa‘ban nâm hatun zâtını ma‘rifet-i şer‘iye ile ârifân olan Mehmed Çelebi b. Hamza ve Abdülbaki b. Muslı ta‘rîfleriyle mu‘arrefe oldukdan sonra meclis-i şer‘-i hatîr-i enverde kızı oğlu işbu bâ‘isü’l-kitâb Mehmed b. Halil mahzarında bi-tav‘ihâ ikrâr-ı tâm ve takrîr-i kelâm edip mahalle-i mezbûrede vâki‘ bir tarafı yine mezbûr Mehmed’in mülk-i müşterâsı olan menzil ve bir tarafı el-Hâc Pîrî mülkü ve bir tarafı Murad Paşa Hânı ve bir tarafı Mehmed Çelebi mülkü ile mahdûd zevcim işbu hazır bi’l-meclis el-Hâc İbrahim b. Abdullah’dan iştirâ ve temellük eylediğim bir tahtânî oda ve bir köşk ve bir kiler ve bir mikdâr hadîkayı müştemil mülk menzilimi bi-cümleti’t-tevâbi‘ ve’l-levâhık mezbûr Mehmed’e iki yüz esedî guruşa tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve temlîk ve teslîm ol dahi iştirâ ve kabûl ve temellük ve tesellüm eyledikden sonra semeni olan meblağ-ı mezbûr iki yüz esedî guruşu hîbetü’d-deyni mimmen aleyhi’d-deynü sahîhatün mısdâkınca mezbûra hîbe-i sahîha-i şer‘iye ile mezbûr Mehmed’e hîbe ve temlîk ol dahi meclis-i hîbede ittihâb ve kabûl eyledi ba‘de’l-yevm menzil-i mezbûr merkūm Mehmed’in mülk-i müşterâsıdır keyfe mâ yeşâ’ mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-âşir min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: es-Seyyid Mehmed Efendi b. Mustafa el-imâm, Abdülbaki Çelebi b. Muslı, Mehmed Çelebi b. Hamza, Salih Çelebi b. Abdi, Solak Ahmed Çelebi b. Mehmed, Mustafa b. Veli.