Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 299 Hüküm no: 266 Orijinal metin no: [72a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Salih b. Hüseyin’in vârisleriyle Konakçı Ali Paşa b. İbrahim’in alacak davasında sulh oldukları Mahmiye-i İstanbul’da Tavukpazarı kurbünde sâkin olup hâlâ Eğri vâlîsi olan emirü’l-ümerâi’l-kirâm Konakçı Ali Paşa b. İbrahim tarafından zikri âtî husûsa vekîl olup yine paşa-yı mezbûrun etbâ‘ından Ahmed b. Mehmed ve İbrahim Çavuş b. Mehmed şehâdetleriyle şer‘an vekâleti sâbite olan kethudâsı el-Hâc Mehmed Ağa b. Abdünnebi meclis-i şer‘-i şerîfde mahmiye-i mezbûrede Haydarhâne Mahallesi sükkânından olup bundan akdem vefât eden Salih b. Hüseyin’in verâseti zevce-i menkûhası Hadîce bt. Abdullah ile sulbiye sagīre kızları Emetullah ve Âişe’ye münhasıra olduğu şer‘an zâhir ve müte‘ayyin oldukdan sonra kendi tarafından asîl ve sagīretân-ı mezbûretânın tesviye-i emirleri için savb-ı şer‘-i hatîrden mansûbe vasîleri olan işbu bâ‘isetü’l-kitâb mezbûre Hadîce Hatun mahzarında bi’l-vekâle ikrâr-ı tâm ve takrîr-i kelâm edip mezbûre Hadîce müteveffâ-yı mezbûrun müvekkilim paşa-yı müşârün-ileyh zimmetinde cihet-i karz-ı şer‘îden bin esedî guruş hakkı olup meblağ-ı mezbûrdan beş yüz beş esedî guruşunu hayatında ahz ü kabz edip dört yüz doksan beş esedî [guruş] hakkı bâkī ve meblağ-ı mezbûru kable’l-ahz fevt olup meblağ-ı mezbûr ırsen bize isâbet etmiş (...) [idi ba‘de’d]-da‘vâ ve müvekkil-i müşârün-ileyh bi’l-külliye inkâr etmekle beynlerinde münâza‘ât-ı kesîre cereyânından (...) [sonra muslihûn] tavassut edip iki yüz esedî [72b] guruş üzerine beynimizde akd-i musâlaha olundukda mezbûre Hadîce dahi müdde‘âsını isbât edemeyip ve müvekkilim müşârün-ileyh dahi yemîninden nükûl etmeyip sulh sagīretân-ı mezbûretân haklarında enfa‘ ve evlâ olmağla sulh-i mezbûru kabûl ve bedel-i sulh olan meblağ-ı mezbûrdan elli esedî guruşunu hâlâ mezbûre Hadice’ye edâ ve teslîm ol dahi ahz ü kabz edip bâkī iki yüz esedî guruşu dahi mezbûre Hadice’ye târih-i kitâbdan altı ay tamamında edâ ve teslîme ta‘ahhüd eyledi meblağ-ı bâkī-i mezbûr mezbûrâta müvekkilim müşârün-ileyhin zimmetinde lâzımü’l-edâ deynidir dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâdî aşer min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Davud Ağa b. Hüseyin, Karakulak Hasan Ağa b. Mehmed, Mumcu Mehmed Ağa b. Süleyman, Musa Efendi b. ( ).