Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 300 Hüküm no: 267 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şemsi Hatun bt. Abdullah’ın evini İsmihan bt. Haşim’e sattığı Mahmiye-i İstanbul’da Sultân Selim Çarşısı kurbünde Koğacı Dede Mahallesi’nde sâkine olup zâtını ma‘rifet-i şer‘iye ile [ârifân] Ömer Çelebi b. Hüseyin ve Canabaz [Canbaz] Osman b. İsmail ta‘rîfleriyle mu‘arrefe olan Şemsi Hatun bt. Abdullah meclis-i şer‘-i hatîr-i lâzımü’t-tevkīrde işbu bâ‘isetü’l-kitâb İsmihan bt. Hâşim nâm hatun mahzarında bi-tav‘ihâ ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrede vâki‘ bir tarafdan Kadri Çelebi mülkü ve bir tarafdan Hasan Beşe veresesi mülkleri ve bir tarafdan Osman Paşa vakfı olan odalar ve bir tarafdan tarîk-ı hâs ile mahdûd olup bir bâb fevkānî odayı ve iki bâb tahtânî odayı ve bir harâbe matbahı ve bir su kuyusunu ve bir kenîfi ve bir dut ağaçlı bir mikdâr havluyu müştemil olan mülk menzili bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık tarafeynden îcâb ve kabûlü hâvî bey‘-ı kat‘î ile mezbûre İsmihan Hatun’a yüz elli esedî guruşa bey‘ ve teslîm ol dahi minvâl-i muharrer üzre iştirâ ve tesellüm eylediğinden sonra semeni olan meblağ-ı mezbûr yüz elli esedî guruşu mezbûre İsmihan Hatun yedinden tamamen ahz ü kabz eyledim min-ba‘d menzil-i mahdûd-ı mezbûrda kat‘a alâka ve medhalim kalmayıp mezbûre İsmihan Hatun’un mülk-i müşterâsı ve hakk-ı sırfı olmuşdur keyfe mâ teşâ’ ve tahtâr mutasarrıfa olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sânî aşer min-Rebî‘i’l-evvel li-sene ihdâ ve tis‘în ve elf. Şuhûdü’l-hâl: İmâm Ali Efendi, Müezzin Mehmed Çelebi b. ( ), Abdülbaki Ağa b. Mustafa, Kadr[î] Çelebi b. Abdülbaki, el-Hâc Hasan b. Mustafa, Kürkçü İbrahim Beşe.