Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 304 Hüküm no: 273 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kerîme bt. Hüseyin’in kocası Mehmed Çelebi’ye bir kısım eşyalarını hîbe ettiği ve vasiyette bulunduğu Mahmiye-i İstanbul’da Molla Aşkī Mahallesi’nde sâkine Kerîme bt. Hüseyin nâm hatun tarafından zikri âtî husûsu ikrâra vekîl olup zât-ı mezbûreyi ma‘rifet-i şer‘iye ile ârifân olan Ahmed Efendi b. Abdurrahman el-müezzin ve Ramazan Dede b. Hüseyin şehâdetleriyle şer‘an vekâleti sâbite olan İmâm Mehmed Efendi b. el-merhûm eş-Şeyh Osman Efendi meclis-i şer‘-i hatîr-i lâzımü’t-tevkīrde müvekkile-i mezbûrenin zevci işbu bâ‘isü’l-kitâb Mehmed Çelebi b. el-merhûm eş-Şeyh Mehmed Efendi mahzarında bi’l-vekâle ikrâr-ı tâm ve takrîr-i kelâm edip müvekkilem mezbûre Kerîme Hatun silk-i mülkünde münselik ortası zümrüd tarafeyni incili bir tek küpe ve bir ayaklı zümrüd küpe ve iki ayaklı bir altın küpe ve zümrüd taşlı bir incili kuşak ve taşsız bir incili kuşak ve bir sîm ön kuşak ve bir altın düğmeli Hind atlası kaftan ve iki hâre kaftan ve bir kibrîtî Hind atlası kaftan ve bir çeşm-i bülbül Hind atlası kaftan ve bir erguvânî şib zıbın ve bir beyâz dîbâ zıbın ve bir sarı kılabdanlı anteri ve bir sandal anteri ve bir kakum kürk ve bir mâ‘i çuka kaplı sansar paçası kürk ve bir zerdâve köhne kürk ve bir ûdî çuka ferâce üç bin ve bir yeşil çuka ferâce ve on üç yorgan ve altı döşek çârşebi ve Bursa ve kumaş yirmi iki yasdık yüzü ve on dört mantarî yasdık ve on iki minder ve iki orta keçesi ve sekiz yan keçesi ve on iki minder çârşebi ve bir zümrüd hâtem ve bir na‘lça mücevher hâtem ve iki aded peşkir ve iki münakkaş sofra ve beş bohça ve kebîr ve sagīr on iki sahan ve beş tencere ve iki tâbe ve iki hoşâb tası ve üç kahve tepsisi ve üç kahve ibriği ve bir musluklu güğüm ve bir kebîr sini ve iki baklava tepsisi ve iki el leğeni ve bir âbdest ibriği ve iki kumaş perde ve bir yemenî perde ve dört döşek ve iki sepet sandık ve iki ayaklı sandık ve altı yemenî yasdık ve iki bakraç ve iki kapı perde[si] ve Gürciyyü’l-asl Yusuf ve sagīr Hasan nâm abd-i memlûklerini ve Rusiyyetü’l-asl Gülbeyaz nâm sagīre câriyesini zevci mezbûr Mehmed Çelebi’ye hîbe-i sahîha-i şer‘iye ile hîbe ve temlîk ve teslîm ve zimmetinde mütekarrir ve ma‘kūdün-aleyh olan dört bin akçe mehr-i müeccelinden dahi üç bin beş yüz akçesi mutâlebesinden mezbûr Mehmed Çelebi’yi ibrâ ve ıskāt edip ol dahi meclis-i hîbede ittihâb ve kabûl ve kabz edip eşyâ-i mezkûre mezbûr Mehmed Çelebi’nin mülk-i mevhûbu olup ve hâlâ dahi otuz miskāl bir çift altın bilezik ve bir Frenk-pesend mücevher ön kuşağını dahi zevci mezbûra teslîm ol dahi tesellüm ve kabz edip şöyle vasiyet eyledi ki emr-i Rabbânî birle vedâ‘-ı âlem-i fânî eylediğimde mârrü’z-zikr bilezik ve kuşak âhara bey‘ olunup semenlerinden on bin akçesi mu‘tâd-ı muvahhidât üzre mesârif-i defn ve ıskāt-ı salâta ve eyyâm-ı mu‘tâdede tabh-ı ta‘âm ve it‘âm-ı fukarâ olunup mâ‘adâsı dahi imâm ve sâir ahâlî-i mahalle-i mezbûre ma‘rifetleriyle vücûh-ı hayra sarf oluna deyü vasiyet ve ta‘yîn edip bu vasiyetini tenfîze mezbûr Mehmed Çelebi’yi vasî nasb ve ihtiyâr etdikde ol dahi vesâyet-i mezbûreyi kabûl ve merâsimini kemâ-yenbagī edâya ta‘ahhüd eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-âşir min-Rebî‘i’l-evvel li-sene ihdâ ve tis‘în ve elf. Şuhûdü’l-hâl: Mustafa Efendi b. eş-Şeyh Osman, İmâm Abdurrahman Efendi b. Receb, el-Hâc Mustafa b. Musa, Hüseyin b. Hasan Yorganî, Ahmed Efendi b. Mehmed.