Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 307 Hüküm no: 275 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Vefat eden Kaytas İbrahim Ağa b. Abdullah’ın Osman Çelebi b. Ömer’e olan borcunun terekesinden ödenmesi
Mahmiye-i İstanbul’da Vâlide Hânı’nda sâkin işbu bâ‘isü’l-kitâb Osman Çelebi b. Ömer nâm kimesne meclis-i şer‘-i hatîrde mahmiye-i mezbûrede Kapıağası Mahallesi ahâlîsinden olup diyâr-ı Mısr-ı Kāhire’de bundan akdem vefât eden Kapıcıbaşı Kaytas İbrahim Ağa b. Abdullah’ın [verâseti] zevce-i metrûkesi Emine bt. Derviş ile sulbî sagīr oğlu Mehmed’e münhasıra olduğu şer‘an zâhir ve mütebeyyin oldukdan sonra sagīr-i mezbûrun kıbel-i şer‘den mansûbe vasîsi olmağla müteveffâ-yı mezbûrun terekesine vâzı‘atü’l-yed olan vâlidesi mezbûre Emine tarafından husûs-ı âtîde husûmet ve redd-i cevâba vekîl olduğu yedinde mazmûnu müsbit hüccet-i şer‘iye ile sâbit olan Mehmed Çelebi b. Davud mahzarında üzerine da‘vâ ve takrîr-i kelâm edip müteveffâ-yı mezbûr Kaytas İbrahim Ağa’ya hayatında bin doksan senesi Rebî‘ülevvelinin yirmi birinci günü yedi yüz elli kıt‘a esedî guruş ikrâz ve teslîm müteveffâ-yı mezbûr dahi iktirâz ve tesellüm ve kabz edip yedime hat ve hatmini hâvî temessük dahi verdiğinden sonra meblağ-ı mezbûr zimmetinde iken kable’l-istifâ vefât etmeğin hâlâ meblağ-ı mezbûru tereke-i vâfiye-i müteveffâ-yı mezbûrdan taleb ederim vekîl-i mezbûra suâl olunsun dedikde gıbbe’s-suâl vekîl-i mezbûr cevâbında müvekkile-i mezbûrenin ber-vech-i muharrer tereke-i müteveffâ-yı mezbûra vaz‘-ı yedini ikrâr lâkin deyn-i mezbûru inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden İbrahim Bey b. Mustafa ve el-Hâc Ali b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr Osman Çelebi târih-i mezbûrda müteveffâ-yı mezbûr Kapıcıbaşı Kaytas İbrahim Ağa’ya hayatında yedi yüz elli kıt‘a esedî guruş ikrâz ve teslîm müteveffâ-yı mezbûr dahi bizim huzûrumuzda iktirâz ve kabz ve tesellüm edip hat ve hatmini hâvî temessük dahi vermişidi biz bu husûsa [bu] vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olup müdde‘î-i mezbûr tahlîf-i şer‘î ile ba‘de’t-tahlîf vekîl-i mezbûr Mehmed Çelebi müvekkile-i mezbûre [ber]-vech-i muharrer müteveffâ-yı mezbûrun meblağ-ı mezbûru iktirâz ve kabz eylediğini ikrâr eyledi dedikde mûcebince ba‘de’l-hükm ve’t-tenbîh mâ-hüve’l-vâki‘ bi’t-taleb ketb olundu.
Fi’l-yevmi’r-râbi‘ aşer min-şehri Rebî‘i’l-evvel li-sene ihdâ ve tis‘în ve elf.
Şuhûdü’l-hâl: Mehmed Çelebi b. Haydar, Mehmed Çelebi b. Cafer, Mehmed Efendi b. ( ) Kâtib-i Ahkâm, Mahmud Çelebi b. ( ) el-mukayyid, Ahmed Çelebi b. Piyale.
[Beyaz] [sahh].
|